اسلام آباد۔ 26 اپریل (اے پی پی) بنجائی وزیر حوالکاری و شینکاری مریم اورنگزیب پارینے کہ عمران خان الیکشن کمیشن اٹی فارن فنڈنگ نا سوج آتا ورندی ءِ ایتے،اوڑآن کس اس سوج کے اودے کرینگ و ھڑکو تننگک، عمران خان خواہک کہ غٹ اونا دروغ انا بیعت ءِ کیر، کرپشن نا حساب ہلپس، او مرضی نا سوج ، تینا مرضی نا ورندی، مرضی نا میچ، مرضی نا ایمپائر و گوازی گر خواہک ہراڑے اونا مرضی اٹ آؤٹ و ناٹ آؤٹ تننگے۔ سے شنبے نادے آ مسکوہی بنجائی وزیر و پاکستان تحریک انصاف نا راہشون چوہدری فواد حسین نا بیان آ ردعمل نا درشانی ءِ کرسا بنجائی وزیر حوالکاری پارے کہ عمران خان مرضی نا جج ، مرضی نا وکیل، و مرضی نا فیصلہ خواہک ، او آئین ءِ منک نئے کانود ءِ، او تینے آئین و کانود تکک۔ اوپارے کہ عمران خان تینے عدالت، جج و پولیس تکک، عدالت سوج کے تو اونا توہین ءِ کننگ، دوبہ خلنگ و ولدا سازش نا شئیر خلنگ نا بناءِ کیک۔ بنجائی وزیر حوالکاری پارے کہ الیکشن کمیشن نا سوج آتیان دا ہشت سال اسکان نرسا کرے و اودوبہ خلنگ و گھیڑ کننگ نا دھڑکو تس۔ اوپارے کہ میڈیا نا سوج آتا اَریفنگ آ چینل، پروگرام و کالم بند کرسا کننگا، مقدمہ و مون ءُ کانود جوڑ کننگا، صحافی تے زندان تیٹی شاغنگا، اوفتا ترک آتے پرغسا کننگا۔ اگہ سیاسی مخالف آک سوج ہرفوسر تو اوفتے پاہو نا سزا و اُرا و چاردیوالی نا تقدس ءِ لتاڑنگا۔ اوپارے کہ چار سال اسکان ہر کوشست آن پد ہم دا اسہ سیاسی جماعت اسے نا ہم برخلاف اسہ دوبہ اس ہم پک کننگ کتو ولے دروغ انا زی آ دروغ تڑسا کرے۔ اوپارے ک داوڑنا بندغ ءِ ذہنی مریض پارہ ہرانا جاگہ پاگل خانہ مریک۔
