الیکشن کمیشن نا مون آ برانچی مچی نا ہچ ءُ سوب اس اف، ریڈزون اٹی برانز کننگپ، ترجمان بنجائی پولیس

اسلام آباد۔ 26 اپریل (اے پی پی) بنجائی پولیس نا ترجمان نا کنڈآن دوشنبے و سے شنبے نا نیامی نن جاری کروک آ اسہ بیان اسے ٹی پاننگانے کہ الیکشن کمیشن آف پاکستان نا مون آ برانزی مچی نا ہچ ءُ سوب اس اف۔ ریڈزون اٹی ڈپٹی کمشنر اسلام آباد نا کنڈآن دفعہ 144 نافذ ءِ۔ سیاسی جماعت و شاری تیان خواست ءِ کہ ریڈزون اٹی برانز کننگپ۔ ترجمان نا رداٹ پرامن برانز غٹ شاری تا جمہوری حق ءِ ہرانا اسلام آباد پولیس شرف ءِ کیک۔ پرامن برانز ریڈزون آن پیشن نیشنل پریس کلب یا ایف نائن پارک اٹ ریکارڈ کرفنگ مریک۔ ترجمان نا پاننگ ءِ کہ ریڈزون نا تہہ ٹی ہروڑنا برانزی مچی نا اسُل موکل تفننگک۔ دا چرجوئی ٹی سپریم کورٹ آف پاکستان و اسلام آباد ہائی کورٹ نا پرمانک پیدوار ءُ۔ امن و ایمنی ٹی اڑاند شاغنگ  یا کانود ءِ دوٹی ہلنگ نا کس اسے موکل تفننگک۔ ریڈزون نا تہہ ٹی و پیشن اینٹی رائٹ فورس انا خصوصی دستہ تعینات کننگانے۔