صدر مملکت ڈاکٹرعارف علوی نا ایف بی آر ءِ غیر رجسٹرڈ بورہ  ڈیلرآتے خراج نیٹ اٹ اتنگ نا پارت

اسلام آباد۔ 25 اپریل (اے پی پی) صدر مملکت ڈاکٹر عارف علوی ایف بی آر ءِ غیر رجسٹرڈ بورہ ڈیلر آتے خراج نیٹ اٹ اتنگ نا پارت کرینے۔ اوایف بی آر ءِ 60 دے اٹی جامع عملدرآمد رپورٹ اس بنجائی  خراج محتسب اٹ جمع کرفنگ نا ہم پارت کرینے۔ دوشنبے نادے آ ایوان صدر نا پریس ونگ آن جاری بیان نا رداٹ صدر مملکت ڈاکٹر عارف  علوی پارے کہ خراج وصولی ءِ ودفنگ کن بورہ نا بھلا ہلوک  و غیر رجسٹرڈ ڈیلر آتے خراج نیٹ اٹ اتنگے، ایف بی آر تون ڈیٹا نا دوئی مننگ آن پد ہم بھلو کچ اسے ٹی بورہ نا ہلوک  خراج نیٹ آن پیشن ءُ، صدر مملکت پارے کہ بورہ نا غیر رجسٹرڈ  خریدار خراج زرتس نا قومی زمواری ءِ پورو کپننگ ءُ۔ صدر مملکت ایف بی آر نا بنجائی ٹیکس محتسب نا پارت آتا برخلاف درخواست ءِ مسترد کرے۔ بنجائی خراج محتسب پرائیویٹ شوگرمل آتیان بورہ نا غیر رجسٹرڈ ہلوک آتے خراج نیٹ اٹ اتنگ کن جاست وپاست نا بناءِ کریسس۔ تدوک آ چار ال اٹی مل آک چندی غیر رجسٹرڈ ہلوک آتے 2.7 ارب روپئی نا بورہ تسر۔ بیرہ مسہ ہلوک آتون قومی خراج نمبر ئسک، ایف بی آر خراج نا دنگ ءِ ودفنگ آ چکار کرے، شوگر مل آتون بورہ نا سپلائی و ہلوک آتا ریکارڈ مریک، ایف بی آر شوگر مل آتا ڈیٹا نا جاچ  ءِ ہلنگ و مخلوق ءِ خراج نیٹ اٹ اوار کننگ اٹ بے سہب مس۔ محتسب چیف کمشنر، ایل ٹی او کراچی ءِ پارت کرے کہ او غیر رجسٹرڈ بندغ آتے خراج نیٹ اٹ اوار کے۔ ایف بی آر بنجائی خراج محتسب نا پرمان نا برخلاف صدر مملکت تون درخواست دائر کریسس۔ صدر مملکت پارے کہ ایف بی آر نا فیلڈ فار میشنز غیر رجسٹرڈ ہلوک آتا معلومدار ی ءِ یکجا کننگ اٹ چسپان اف، ایف بی آر مل آتا ماہانہ سیلز خراج گوشوارہ غاتیا است جم ءِ، ڈیٹا نا جاچ ءِ ہلپننگ انگ ءِ، ایف بی آر نا فیلڈ فارمیشنز شوگر مل آتا ڈیٹا نا وخت آ جاچ ءِ ہلسا ہلوک آتا سرجم آتے دوئی کننگ کیک۔ صدر مملکت پارے کہ ایف بی آر نا تینا فرض انا ادائیگی ٹی سنگین ڈیوالئی و نابودی بدانتظامی آنبار ءِ۔ خراج ادائیگی ءِ ودفنگ کن محتسب نا سلاہ و سوج آتے بورہ نا بشخ آ لاگو کننگے۔ صدر مملکت پارت کرے کہ ایف بی آر 60 دے اٹی بنجائی خراج محتسب ءِ عملدرآمد نا جامع رپورٹ اس پیش کے۔