مسلم لیگ (ن) نا راہشون محسن شاہنواز رانجھا نا پریس کانفرنس

اسلام آباد۔ 25 اپریل (اے پی پی) مسلم لیگ (ن) نا راہشون و قومی اسمبلی نا باسک محسن شاہنواز رانجھا پارینے کہ جاست وپاست اٹی سازش پک متو عمران خان و اونا ترجمان قوم اتون دروغ تڑنگ آ معافی خوار ورنہ اوفتا برخلاف ہتک عزت نا دعویٰ دائر کننگک۔ دوشنبے نادے آ داڑے پریس کانفرنس آن تران کرسا اوپارے کہ قاسم سوری نا رولنگ آن کروڑ آ بندغ آتا جوزہ غاک مجروح مسنو، اوآئین ءِ پرغانے اودے قوم آن معافی خواؤئی مریک، اودے ہتک عزت نا نوٹس تننگک۔ محسن شاہنواز رانجھا پارے کہ عدالتی فیصلہ غان پد قاسم سوری نا دروغ قوم انا مون آ پاش مسنے۔ جاست و پاست آن پک مس کہ پاکستان نا برخلاف ہچ ءُ سازش اس متنے عمران نیازی وقاسم سوری 15 دے اٹی قوم و گچین مروک آ نمائندہ غاتیان معافی خوار۔ اوپارے کہ عمران نیازی نا غٹ ترجمان تے وارننگ ءِ کہ پاکستان نا کانود تینے سرفک ۔ دا غٹ بندغ آتے ہتک عزت نا نوٹس گدریفنگ انگ ءِ۔ اوپارے کہ عمران نیازی و اونا مخلوق سوشل میڈیا غا عدالت عظمیٰ نا توہین ءِ کننگ ءُ۔ پاکستانی قوم آئین شکنی کروک آتا برخلاف تحریک چلیفک۔ اسہ سوج اسے نا ورندی ٹی اوپارے کہ آئینی زمواری پورو کپننگ نا دروشم اٹ صدر نا برخلاف مواخذہ نا تحریک اس اتنگ مریک۔ اسہ پین سوج اسے نا ورندی ءِ ترسا اوپارے کہ عمران نیازی 8 سال اسکان فارن فنڈنگ نا باندات ءِ تورساکرے۔