وزیر خزانہ مفتاح اسماعیل نا پاک یو ایس بزنس کونسل نا ڈل اتون اوڑدہی ٹی گپ وتران

اسلام آباد۔ 23 اپریل (اے پی پی) بنجائی وزیر خزانہ ومحصولات مفتاح اسماعیل پارینے کہ امریکہ نا کارپوریٹ شعبہ و پاکستان نا نیام اٹ دیرینہ و فائدہ ئی تعلقداری جوڑ ءِ، پاکستان نا چندی بشخ آتیٹی امریکی زرکاری ءِ راغب کننگ ننا حکومت نا اولیت آتیٹی اوار ءِ۔ تدوک آ دے واشنگٹن اٹی پاکستان نا سفارت خانہ ٹی یو ایس  پاکستان بزنس کونسل نا ڈل اتون گپ وتران کرسا اوپارے کہ امریکہ نا کارپوریٹ نا بشخ انا پاکستان تون دیرینہ و فائدہ ئی تعلقداری اسے، پاکستان نا چندی بشخ آتیٹی امریکی زرکاری ءِ راغب کننگ ننا حکومت نا اولیت آتیٹی اوار ءِ۔ وزیر خزانہ پارے کہ حکومت ملک اٹی کاروبار کن سازگار چاگڑد اس فراوان کننگ خواہک و دامسخت کن غٹ سلاہ تا ستاءِ کننگک۔ وزیرخزانہ  کشت وکشار، تکنیکی ، فارما، ڈیجیٹل بینکاری نا خصوصی وڑاٹ ذکر ءِ کرے و پارے کہ دا بشخ آتیٹی امریکی کمپنی پاکستان اٹی تینا زرکاری ٹی ودکی کننگ کیرہ۔ وزیر خزانہ ڈل انا باسک آتا چندی سوج آتا ورندی ءِ ہم تس۔ وزیر مملکت ڈاکٹر عائشہ غوث پاشا، گورنر اسٹیٹ بینک ڈاکٹر رضا باقر، سیکرٹری خزانہ، ڈپٹی گورنر اسٹیٹ بینک ، ایڈیشنل سیکرٹری خزانہ و سفارت خانہ نا سینئر کمامدار آک ہم داوخت آ ساڑی ئسر۔