وزیر خزانہ مفتاح اسماعیل نا امریکی تھینک ٹینک اٹلانٹک کونسل آن تران

اسلام آباد۔ 23 اپریل (اے پی پی ) بنجائی وزیر خزانہ و محصولات ڈاکٹر مفتاح اسماعیل پارینے کہ حکومت برآمد آتیٹی سوگو ودکی ءِ پک کننگ کن ریسہ وار گام گیج کیک، ہندن ءُ زرگزرانی بحالی و شونداری ءِ خوانہ ہراٹی راج انا زرگزرانی وڑاٹ نزور تپہ غاک اوار مریر۔ اوداہیت ءِ تدوک آ دے واشنگٹن ڈی سی ٹی پنی آ امریکی تھینک ٹینک اٹلانٹک کونسل نا کنڈآن دود آن تران کرسا پارے۔ وزیر خزانہ ڈاکٹر مفتاح اسماعیل پاکستان اٹی پوسکن جوڑ مروک آ حکومت نا اقتصادی ایجنڈا و اولیت آتے مون آ تخا و پارے کہ حکومت زرگزرانی بحالی و شونداری ءِ ممکن کننگ کن گام گیج آتا چرجوئی ءِ برجاتخک۔ وزیر خزانہ پارے کہ نن ہندن ءُ زرگزرانی بحالی اس خوانہ ہراڑآن راج انا زرگزرانی وڑاٹ نزور تپہ غاتے ہم فائدہ رسینگے۔ وزیر خزانہ پارے کہ پوسکن آ حکومت ملک اٹی کاروبار و زرکاری کن دوستانہ چاگڑد فراوان کننگ ءِ، نن زرگزران نا غٹ بشخ آتیٹی امریکی زرکاری ءِ چکنگ اٹ سنبرینگوک اُن۔ وزیر خزانہ بشخ ہلوک آتا سوج آتا ورندی ءِ ہم تس ہرافتے ٹی امریکی حکومت نا کارندہ ، اقتصادیات نا چاہندار، تھنک ٹینک انا چاہندار و پنی آ پاکستانی امریکی کاروباری شخصیت آک اوار ئسر ۔ داکان بیدس وزیرخزانہ واشنگٹن اٹی میڈیا نمائندہ غاتے ملکی زرگزران، حکومتی اولیت و زرگزرانی اصلاحات نا بابت چست کروک آ گام گیج آتا  بابت حوال تس۔