راولپنڈی۔ 23 اپریل (اے پی پی ) قطبی وزیرستان اٹی جہانی سیم انا ایپار اوغانستان نا تہہ غان دہشت گرد آتا پاکستانی فوجی تیا سم کاری آن 3 ورنا شہید مسر، ورندی سم کاری آن دہشت گرد آتے بھلو جانی نسخان اس سرمننگ نا حوال آک ءُ۔ پاک فوج انا شعبہ تعلقات عامہ نا رداٹ جہانی سیم انا ایپار اوغانستان نا تہہ آن دہشت گرد آک قطبی وزیرستان نا ضلع دیواگر نا عمومی علاقہ ٹی پاکستانی فوجی تیا سم کاری کریر ہرافتا فوجیک جوان وڑاٹ ورندی ءِ تسر۔ پک انٹیلی جنس حوال آتا رداٹ دہشت گرد آتے بھلو جانی نسخان اس رسینگا۔ ولے اسہ ایلو آ سم کاری ٹی حوالدار تیمور (سکنہ جہلم، عمر30 سال ) ، نائیک شعیب (سکنہ اٹک ، عمر 38 سال ) و سپاہی ثاقب نواز (سکنہ سیالکوٹ عمر 24 سال ) نرزوری اٹ جنگ ترسا شہیدی نا جام ءِ کنگر۔ آئی ایس پی آر نا پاننگ ءِ کہ پاکستان دہشت گر آتا کنڈآن اوغان گل زمین ءِ پاکستان نا برخلاف سرجزآتیکن کاریم اٹ اتنگ نا ترندی اٹ مذمت ءِ کیک و اومیت کیک کہ اوغان حکومت آخبت اٹ داوڑنا سرجزآتا موکل تفک۔ پاک فوج دہشت گردی نا لعنت نا برخلاف پاکستان نا سیم تا دفاع کن سنبرینگوک ءِ وننا نرزور ورناتا داوڑنا قربانیک ننا عزم ءِ پین سوگو کیرہ۔
