اسلام آباد۔ 22 اپریل (اے پی پی) بنجائی کابینہ ٹی ودکی کننگانے، کابینہ ٹی پین 4 باسک آتے اوار کننگانے ہرافک جمعہ نادے آ ایوان صدر اٹی اڈ ہلوک اسہ سادہ و پروقار دود اسے ٹی سوغند ہرفیر۔ صدر مملکت ڈاکٹر عارف علوی پوسکن آ بنجائی وزیر و وزیر مملک آتیان سوغند ہلک۔ سوغندی دود اٹی وزیراعظم محمد شہباز شریف ، سول و فوجی کمامدار، حکومت اٹی اوار سیوتی جماعت آتا راہشون و ایلو اہم شخصیت آک بشخ ہلکر۔ بنجائی کابینہ ٹی ہرا پوسکن آ وزیر آتے کابینہ ٹی اوار کننگانے اوفتے ٹی میاں جاوید لطیف ، آغاحسن بلوچ و چوہدری سالک حسین ءِ بنجائی وزیر جوڑ کننگانے وخت اس کہ محمد ہاشم نوتیزئی ءِ وزیر مملکت نا حیثیت اٹ کابینہ ٹی اوار کننگانے۔ داکان مست 19 اپریل آ اولیکو ریسہ ٹی کابینہ ٹی 30 بنجائی وزیر و 3 وزیر مملکت آتے اوار کننگاسس۔ کابینہ ٹی مہالو آن 3 سلاہکار تے ہم اوار کننگانے۔ بنجائی کابینہ نا سوغندی دود آن مست وزیراعظم محمد شہباز شریف پی ڈی ایم اٹی اوار جماعت و ایلو سیوتی جماعت آتا سروک آتون کابینہ نا ٹہیفنگ کن سلابت کریسس اوکان پد کابینہ ءِ گڈیکو دروشم اس تننگاسس۔ داہیت ذکر انا قابل ءِ کہ مسلم لیگ (ن) نا صدر محمد شہباز شریف 11 اپریل آ ملک انا پوسکن آ وزیراعظم نا حیثیت اٹ سوغند ہرفیسس، داکان مست قومی اسمبلی محمد شہباز شریف ءِ 174 وونٹ آتے اٹ پاکستان نا 23می وزیراعظم نا حیثیت اٹ گچین کریسس۔
