آٹو سیکٹر اٹی چاگڑد دوست گاڈی تا پیدوار ءِ ودفوئی مریک، بنجائی وزیر صنعت و پیدوار مخدوم سید مرتضیٰ محمود نا دیوان آن تران

اسلام آباد۔ 22 اپریل (اے پی پی) بنجائی وزیر صنعت و پیدوار مخدوم سید مرتضیٰ محمود پارینے کہ آٹو سیکٹر اٹی چاگڑد دوست گاڈی تا پیدوار ءِ ودفوئی مریک، کنزیومرءِ’’اون منی ‘‘ کون آ ویل آتیان چٹفنگ کن حکمت عملی اس مرتب کننگک۔ داخیال آتا درشانی ءِ او جمعہ نادے آ آٹو انڈسٹری نا بارواٹ دیوان آن تران کرسا کرے۔ سی ای او انجینئرنگ ڈویلپمنٹ بورڈ بنجائی وزیر ءِ حوال تس۔ دیوان ءِ پاننگاکہ پاکستان اٹی ٹیکٹر اٹی 92 درسد، موٹرسائیکل اٹی 95 درسد و گاڈی تیٹی 55 درسد لوکائزیشن مسنے، آٹو ڈویلپمنٹ پالیسی 2016-21نا رداٹ 7 پوسکن ءُ آٹو کمپنی پاکستان اٹی پلانٹ خلکر، پوسکن آ آٹو پالیسی 2021-26نا رداٹ آٹو انڈسٹری ٹی ویلیو ایڈیشن 30 درسد اسکان دیک، پوسکن آ آٹو پالیسی ٹی برآمد و الیکٹرک وہیکل ءِ مون آ دننگ اوار ءِ، حوال اٹی پاننگاکہ گاڈی تا تاخیر اٹ ڈلیوری آ کنزیومر ءِ داتم اسکان 4 ارب روپئی نا زر پدی تننگانے، تدوک آ سال سوا اِرا لکھ گاڈی ہندی وڑاٹ جوڑ کننگا، اومیت ءِ پوسکن آ ٹو پالیسی نا کمک اٹ ملکی آٹو انڈسٹری پین شون ہلیک۔