راولپنڈی۔ 22 اپریل (اے پی پی) بلوچستان اٹی آواران نا خڑک سیکورٹی فورس آتا چوکی آ دہشت گرد آتا جلہو ءِ بے سہب کننگا، ولے نروک آ دہشت گرد آتون اسہ ایلو آ سم کاری ٹی فوجی آفیسر اس شہید وخت اس کہ سپاہی اس ٹھپی مس۔ پاک فوج انا شعبہ تعلقات عامہ آئی ایس پی آر نا رداٹ 21/22اپریل نا نن ، دہشت گرد آک بلوچستان اٹی آواران نا خڑک علاقہ کاہان اٹی سیکورٹی فورس آتا اسہ چوکی اسے آ جلہو کریر۔ فورس آک جلہو ءِ سرسہبی اٹ بے سہب کننگ آن پد نروک آ دہشت گرد آتا خڑک انا مش تیٹی تعاقب ءِ کریر۔ نروک آ دہشت گرد آتے توننگ کن جوڑ کروک بلاکنگ پوزیشن تیان اسٹ اسے آ دہشت گرد و سیکورٹی فورس آتا نیام اٹ اسہ ایلو آ سم کاری مس۔ جھیڑہ ٹی وطن نا اسہ نرزور گل زادہ اس میجر شاہد بشیر شہیدی نا جام ءِ نوش کرے و دہشت گرد آتے بھلو نسخان اس ترسا اسہ سپاہی اس ٹھپی مس۔ آئی ایس پی آر نا پاننگ ءِ کہ سیکورٹی فورس آک قوم اتون اواری اٹ بلوچستان نا امن، سوگوی و شونداری ءِ لتاڑنگ نا کوشست آتے بے سہب کننگ کن سنبرینگوک ءُ۔
