اسلام آباد۔ 22 اپریل (اے پی پی) بنجائی وزیر خزانہ و محصولات مفتاح اسماعیل پارینے کہ تحریک انصاف نا حکومت ملک انا زرگزران نا بیڑہ ءِ غرق کرینے، عمران خان نا حکومت اٹی ملک انا وام تیٹی 20 ٹریلین روپئی نا ودکی مسنے۔ مسکوہی وزیر خزانہ شوکت ترین نا ٹک آتا ورندی ءِ ترسا اوپارے کہ مارچ 2022اسکان پی ٹی آئی نا حکومت نا کنڈآن جم وام اٹی 20 ٹریلین روپئی نا ودکی مس۔ اوشوکت ترین ءِ پارے کہ او دسمبر 2021اسکان نا حساب وکتاب ءِ انت اکن تننگ ءِ، انت دا حقیقت آن چکارءِ اسہ کنڈ کننگ و غلط بیانی اس اف؟ یقینی وڑاٹ نن نے آن گچین طرزعمل نا اومیت تخنہ۔ وزیرخزانہ پارے کہ تحریک انصاف نا اولیکو مسہ سال اٹی 10 ٹک 22 ٹریلین روپئی نا نسخان مس۔ دا سال نسخان نا کچ 5 ٹک 575 ٹریلین روپئی مننگ نا کساس ءِ و داحساب وکتاب وزارت خزانہ شوکت ترین تون شیئر کریسن ہنداخاطرآن مسکوہی وزیر خزانہ اونا تردید نا زحمت ءِ کپ، حقیقت دادے کہ خالص نسخان 15 ٹک 795 ٹریلین روپئی ءِ،۔ وزیر خزانہ پارے کہ شوکت ترین مسکوہی حکومت آتا وام تیٹی سود انا زرتس ءِ اوار کیک ولے تینا حکوم تنا وام اٹی اودے اوار کپک۔ مفتاح اسماعیل پارے کہ پی ٹی آئی والاک جی ڈی پی نا کچ آن وام تا حساب وکتاب اس شین تننگ نا وخت آ ننکن جتا و تینکن جتا بنداوی سال ءِ کاریم اٹ اتنگ ءُ۔ وزیر خزانہ پارے کہ پی ٹی آئی نا حکومت ننا سرکاری وام تیٹی 80درسد ودکی کرینے۔ تدوک آ 71 سال اٹی پاکستان نا حکومت آک اخس وام ہلکونو ، عمران خان نا 3 سال و 9 تُو انا دور حکومت اٹ اوفتا 80 درسد دوئی کننگا۔ 71 سال اٹی حکومت آک 25 ٹریلین روپئی نا وام وخت اس کہ عمران خان نا حکومت اٹی 25 ٹریلین روپئی نا وام ہلنگا۔ اوپارے کہ عمران خان نا حکومت زرگزران نا بیڑہ ءِ غرق کرینے۔
