اسلام آباد۔ 21 اپریل (اے پی پی) بنجائی وزیر خزانہ و محصولات مفتاح اسماعیل پارینے کہ آئی ایم ایف نا پروگرام ءِ ٹریک آ پدی اتنگ کن او واشنگٹن آ روانہ مننگ ءِ ، پی ٹی آئی حکومت گیس انا بشخ اٹی 1500 ارب روپئی نا گردشی وام اِلانے۔ پنچ شنبے نادے آ راجی رابطہ نا ویب سائٹ ٹویٹر آ جاری ٹویٹ آتیٹی وزیر خزانہ پارے کہ آئی ایم ایف نا پروگرام ءِ ٹریک آ پدی اتنگ کن او واشنگٹن آ روانہ مننگ ءِ ، داپروگرام ءِ پی ٹی آئی و عمران خان ڈی ریل کرسا ملکی زرگزران ءِ خطرہ ٹی شاغاسس۔ وزیرخزانہ پارے کہ مسہ سال ای سی ایل اٹی مننگ آن پد او لندن نا سفر ءِ ہم کیک ہراڑے او تینا لیڈر میاں نواز شریف تون اوڑدہی کیک۔ پی ٹی آئی نا راہشون حماد اظہر نا چست کروک ٹک آتا ورندی ءِ ترسا وزیرخزانہ پارے کہ اودے بھاز خوشی مسنے کہ حماد اظہر گیس انا بشخ اٹی 1500 ارب نا گردشی وام تا اعتراف ءِ کرینے۔ اوپارے کہ عمران خان نا نابودی و دروغ آن بیدس اسہ گڑاس ہم پی ٹی آئی نا حکومت ءِ ایل این جی نا پرائسنگ آن توتویسس۔ مفتاح اسماعیل پارے کہ او پیدوار وڑاٹ پاہک کہ پی ٹی آئی نا حکومت گیس انا بشخ اٹی 1500 ارب روپئی نا گردشی وام اِلانے داٹی سوئی نادرن نا 200 ارب روپئی اوار ءُ۔ اوپارے کہ حکومت اٹ بننگ آن مستاونا خیال ئس کہ گیس انا بشخ انا گردشی وام بیرہ 700 ارب روپئی ءُ۔
