اسلام آباد۔ 20 اپریل (اے پی پی) وزیراعظم شہباز شریف تون پاکستان اٹی برطانیہ نا ہائی کمشنر ڈاکٹر کرسچن ٹرنر چارشنبے نادے آ داڑے اوڑدہی کرینے۔ وزیراعظم آفس نا میڈیا ونگ انا کنڈآن جاری بیان نا رداٹ برطانوی ہائی کمشنر وزیراعظم شہبازشریف ءِ وزارت عظمیٰ نا منصب ءِ سنبھالنگ آ مبارکبادی تس و برطانوی حکومت نا کنڈآن اوڑکن نیک است خواہی تا درشانی ءِ کرے۔ وزیراعظم شہباز شریف برطانوی وزیراعظم بورس جانسن نا تہنیتی ٹویٹ آ اونا منت واری ءِ ہرفے۔ وزیراعظم پارے کہ پاکستان برطانیہ تون تینا تعلقداری تے قدر انا نظر اٹ ہرک ہرا بھلو کچ اسے آ چندی امور اٹی تاریخی رابطہ و اسیجائی فائدہ غاتیا مبنی ءِ۔ وزیراعظم گچین واپاری و زرکاری تعلقداری تا اہمیت آ زور شاغا۔ او ہڑتوم آ ملک آتا نیام اٹ تعلقداری تے سٹریٹجک کہول آ مون آ دننگ نا گرج آ ہم زور شاغا۔ وزیراعظم برطانیہ ٹی رہینگوک کم و ود 1.6 ملین سمندر پار پاکستانی تا ہڑتوم آ ملک آتا نیام اٹ ادا کروک آ پول انا کڑد ءِ تالان کرسا کانودی ہجرت نا بشخ اٹی کمکاری ءِ سوگو کننگ نا گرج آ زور شاغا تانکہ دا بابت ساڑی کچ ءِ پبی وڑاٹ کاریم اٹ اتنگ مرے۔ وزیراعظم پاکستان اٹ تعلیم، جان جوڑی و ایلو راجی بشخ آتا مون آ دننگ کن برطانیہ نا گام گیج آتا ہم ستاءِ کرے۔ برطانوی ہائی کمشنر وزیراعظم نا منت واری ءِ ہرفے و ہڑتوم آ کنڈآتا کمکاری ءِ سوگو و ودفنگ کن پاکستان تون اواری اٹ کاریم کننگ نا است خواہی نا درشانی ءِ کرے۔
