اسلام آباد۔ 20 اپریل (اے پی پی) وزیراعظم محمد شہباز شریف تون پاکستان اٹی بحرین نا سفیر محمد ابراہیم محمد چارشنبے نادے آ داڑے اوڑدہی کرے۔ وزیراعظم آفس نا میڈیا ونگ انا کنڈآن جاری بیان نا رداٹ بحرین نا سفیر وزیراعظم شہباز شریف ءِ بحرین نا سرکڑدہ غاتا کنڈآن وزارت عظمیٰ نا منصب ءِ سنبھالنگ آ مبارکبادی تس۔ بحرین نا سفیر پاکستان و بحرین نا نیام اٹ متکن و دوستانہ تعلقداری تا ذکر ءِ کرسا پارے کہ بحرین پاکستان تون ہڑتوم آ کنڈآتا تعلقداری تے پین سوگو کننگ نا خواہندار ءِ۔ وزیراعظم شہباز شریف بحرین نا سرکڑدہ غاتا کنڈآن تہنیتی کلہو آ بحرین نا سفیر نا منتواری ءِ ہرفے۔ اوپارے کہ پاکستان بحرین تون تینا تعلقداری تےبھاز اہمیت ایتک، و چندی بشخ آتیٹی تین پہ تینی کمکاری ءِ پین مون آ دننگ نا خواہندار ءِ۔ وزیراعظم واپار، ،زرکاری، انفارمیشن ٹیکنالوجی ، افرادی قوت و غذائی رکھ اتون اوار چندی بشخ آتیٹی کمکاری نا گمان و ہڑتوم آ کنڈآتا اقتصادی رابطہ غاتے سوگو کننگ نا اہمیت ءِ تالان کرے۔ وزیراعظم بحرین نا حکومت نا کنڈآن کورونا دین انا مشکل وخت اٹی پاکستانی برادری نا خیالداری آ منت واری ءِ ہرفے۔ اواسلام آباد اٹی کنگ حماد نرسنگ یونیورسٹی اینڈ ایسوسی ایٹڈ میڈیکل سائنسز ہاسپٹل نا ڈٹ آتا ہم ستاءِ کرے ہرا ہڑتوم آ ملک آتا نیام اٹ خڑکی دوستانہ تعلقداری تا درشانی ءِ۔ بحرین اٹ بھاز بھلو کچ اسے ٹی سمندر پار پاکستانی رہینگرہ و پاکستان و بحرین نا نیام اٹ اسیجائی عقیدہ و قدر انا بنداو آ خڑکی دوستانہ تعلقداری ءِ۔ ہڑتوم آ ملک آک اسہ ایلو تون خڑکی شریداری و چندی علاقائی و جہانی امور آ اسہ وڑ است خواہی تخرہ۔ پاکستان و بحرین تدوک آ سال تینا سفارتی تعلقداری تا قیام نا پنجامی سال دے ءِ ہم اڈ تسوسس۔
