اسلام آباد۔ 20 اپریل (اے پی پی) چیئرمین سینیٹ محمد صادق سنجرانی تون چینی سفارت خانہ نا ناظم الامور پینگ چُن زوئی نا پارلیمنٹ ہاؤس اٹی اوڑدہی مس۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا امور و سی پیک ڈٹ آتا بابت گپ وتران کننگا۔ چینی سفارت خانہ نا ناظم الامور تون گپ وتران کرسا چیئرمین سینیٹ پارے کہ پاکستان جہانی و علاقائی امور اٹی چین نا کڑد ءِ بھاز اہمیت ایتک۔ اوڑدہی ٹی ہڑتوم آ کنڈآتا تعلقداری ءِ پین مون آ دننگ آ امنا کننگا۔ چیئرمین سینیٹ محمد صادق سنجرانی پارے کہ پاکستان نا حکومت چین اتون زرگزرانی تعلقداری تے پین ودفنگ نا خواہندار ءِ۔ پاکستان و چین نا نیام اٹ کثیر الجہتی شریداری پاکستان نا پالیسی نا اہم ءُ جزو اسے۔ اوپارے کہ چین مدام اہم باندات آتا بارواٹی جہانی فورم تیا پاکستان نا موقف نا تائید ءِ کرینے و پاک۔ چین سنگتی ہڑتوم آ ملک آتا الس نا است آتیٹی رہینگک۔ چیئرمین سینیٹ پارے کہ صنعت کاری، کشت وکشارو ڈیجیٹل ٹیکنالوجی ٹی چین نا کنڈآن زرکاری ءِ پین مون آ دننگ نا گرج ءِ۔ اوڑدہی ٹی سی پیک ڈٹ آتیا ہم سرجم گپ وتران کننگا۔ چیئرمین سینیٹ محمد صادق سنجرانی پارے کہ سی پیک ڈیہہ کن گیم چینجر اس پک مریک ہراڑآن شونداری نا اسہ پوسکن ءُ بشخ اس بناکیک۔ چین ہر مشکل وخت اٹی پاکستان نا کمک ءِ کرینے ہراڑکن مدام اونا منتوار مرینہ۔ چینی ناظم الامور علاقائی امن و سوگوی کن پاکستان نا کوشست آتا ستاءِ کرے و سی پیک آ پیش رفت آ است جمی نا درشانی ءِ کرے۔ پینگ چُن زوئی پاکستان تون ہرکہول آ سفارتی کمکاری ءِ پین گچین کننگ کن تینا کڑد ءِ ادا کننگ نا باوری کرفے۔
