اسلام آباد۔ 20 اپریل (اے پی پی) بنجائی وزیر خزانہ و محصولات مفتاح اسماعیل پارینے کہ مسکوہی حکومت تاریخ نا غٹ آن زیات بجٹ نسخان و واپاری نسخان اس اِلا، کبینی نا کچ بڑز آ ئس، خولم و بورہ ہرافتے نن برآمد کرینہ او درآمد کننگ آ بیو س اُن۔ اوپارے کہ روپئی نا نہاد اٹی تاریخی کمتی و زرمبادلہ نا کوڑی تیٹی ریکارڈ کمتی مسنے ولے اسد عمر صاحب پاننگ ءِ کہ زرگزران گچین ءِ؟ غلط بیانی نا ہم حداس مریک۔ وزیر خزانہ پارے کہ شہباز شریف نا حکومت ای سی سی نا اولیکو دیوان اٹی تیل انا نہاد آتے برقرار تخنگ کن 31 ارب روپئی نا منظوری ءِ تسنے، یکم آن 15 اپریل اسکان پیٹرولیم مصنوعات آتا نہاد آتے برقرار تخنگ نا پڑو ءِ پی ٹی آئی حکومت کریسس ، ولے داڑکن فنڈ جتا کننگتویسس۔ اوپارے کہ 16 اپریل آن 30 اپریل اسکان نا مد اکن پیٹرولیم مصنوعات آتا نہاد آتے برقرار تخنگ نا فیصلہ ءِ ننا حکومت کرے و داڑکن 36 ارب روپئی نا فنڈ جتا کننگانے۔ داکان بیدس مارچ انا تُو اٹی اِرا ارب نا بقایہ جات ہم ننا حکومت ادار کننگ ءِ۔ اوپارے کہ دافیصلہ غاتیان کیش انا حالیت آتیٹی گچینی بریک ہراڑآن پیٹرولیم مصنوعات نا رسد اٹ بروک اڑاند آتے مر کننگ اٹ کمک رسینگک۔
