اسلام آباد۔ 19 اپریل (اے پی پی) وزیراعظم شہباز شریف تون پاکستان اٹی متحدہ عرب امارات ، یواے ای نا سفیر حماد عبید ابراہیم سالم الزابی سے شنبے نادے آ داڑے اوڑدہی کرے۔ متحدہ عرب امارات ناسفیر وزیراعظم ءِ وزارت عظمیٰ نا منصب ءِ سنبھالنگ آ مبارکبادی ترسا متحدہ عرب امارات نا کنڈآن پاکستان تون ہڑتوم آ کنڈآتا تعلقداری تے پین سوگو کننگ نا است خواہی نا درشانی ءِ کرے۔ وزیراعظم شہباز شریف متحدہ عرب امارات نا سفیر نا منت واری ءِ ہرفے و پاکستان و متحدہ عرب امارات نا نیام اٹ چندی بشخ آتیٹی ہڑتوم آ کنڈآتا کمکاری نا مون آ دننگ کن اونا کوشست آتا ستاءِ کرے۔ وزیراعظم متحدہ عرب امارات نا سرکڑدہ غاتیکن نیک است خواہی نا درشانی ءِ کرے۔اوہڑتوم آ ملک آتا نیام اٹ شریداری ءِ پین ودفنگ کن یواے ای نا سرکڑدہ غاتون اواری اٹ کاریم کننگ نا عزم انا ہم درشانی ءِ کرے۔ وزیراعظم بیرہ پنجا سال انا وکت اٹی ملک ءِ بدل کننگ نا متحدہ عرب امارات نا سرکڑدہ غاتا وژن نا ہم ستاءِ کرے۔ وزیراعظم ہڑتوم آ ملک آتا نیام اٹ واپار، زرکاری، توانائی، انفراسٹرکچر، غذائی رکھ و روزگار نا وارخواہی ودی کننگ تون اوار اقتصادی تعلقداری تا پین مون آ دننگ کن تینا حکومت نا عزم انا درشانی ءِ کرے۔ وزیراعظم پارے کہ پاکستان و متحدہ عرب امارات نا نیام اٹ مدام خصوصی تعلقداری مسنے ہرافتا بنداو اسیجائی تاریخ ، عقیدہ و جغرافیائی خڑکی آٹی ءِ۔ اوپارے کہ ہڑتوم آ ملک آتا الس نا نیام اٹ ہم خڑکی رابطہ استوار ءِ۔ وزیراعظم متحدہ عرب امارات نا شونداری ٹی سمندر پار پاکستانی تا اہم کڑد انا ستاءِ کرے ہرا ہڑتوم آ ملک آتا نیام اٹ سوگو پول انا کڑد ءِ ادا کیرہ ۔ پاکستان و متحدہ عرب امارات نا نیام اٹ دہائی تیا متکن دوستانہ تعلقداری ءِ و بڑزکو کہولی رابطہ غاتیان ہڑتوم آ کنڈآتا کمکاری ءِ مون آ دننگک۔

متعلقہ مضامینمصنف کی طرف سے مزید