اسلام آباد۔ 19 اپریل (اے پی پی) پوسکن آ بنجائی کابینہ نا باسک آک ایوان صدر اٹی اڈ ہلوک آ اسہ سادہ و پروقار دود اسے ٹی سوغند ہرفیر، چیئرمین سینیٹ محمد صادق سنجرانی پوسکن آ بنجائی وزیر و وزیر مملکت آتیان سوغند ہلک۔ سے شنبے نادے آ داڑے وزیراعظم محمد شہباز شریف، اسپیکر قومی اسمبلی راجہ پرویز اشرف، سول و فوجی کمامدار، حکومت اٹی اوار سیوتی جماعت آتا سرکڑدہ، سیاسی سرکڑدہ و ایلو اہم شخصیت آک سوغندی دود اٹی بشخ ہلکر۔ پوسکن آ بنجائی کابینہ ٹی مسلم لیگ (ن)، پاکستان پیپلزپارٹی، جمعیت علماء اسلام ، ایم کیو ایم و ایلو سیوتی جماعت آتے نمائندگی تننگانے۔ پوسکن آ بنجائی کابینہ نا سوغندی دود آن مست وزیراعظم محمد شہباز شریف پی ڈی ایم اٹی اوار جماعت و ایلو سیوتی جماعت آتا سرکڑدہ غاتیان کابینہ نا ٹہیفنگ کن سلابت کریسس اوکان پد کابینہ ءِ گڈیکو دروشم اس تننگا۔ دا ہیت ذکر انا قابل ءِ کہ مسلم لیگ (ن) نا صدر محمد شہباز شریف 11 اپریل آ ملک انا پوسکن آ وزیراعظم نا حیثیت اٹ سوغند ہرفیسس، داکان مست قومی اسمبلی محمد شہباز شریف نا 174 وونٹ آتے اٹ پاکستان نا 23 می وزیراعظم نا حیثیت اٹ گچین کریسس۔
