اسلام آباد ۔ 19 اپریل (اے پی پی) بنجائی وزیر حوالکاری و شینکاری مریم اورنگزیب سے شنبے نادے آ تینا عہدہ نا چارج ءِ سنبھالا۔ وزارت حوالکاری ٹی تینا دفتر آ بننگ آ سیکرٹری حوالکاری شاہیرہ شاہد تون اوار وزارت نا ایلو بڑزکو آفیسر آک وزیر حوالکاری و شینکاری ءِ جم وجوش اٹ بخیر کریر۔ اودے وزارت نا امور نا بابت حوال ہم تننگا۔ مریم اورنگزیب داوخت آ گپ و تران کرسا پارے کہ حکومت آجوئی سلاہ درشانی آ پورو یخین تخک۔ اوپارے کہ میڈیا ہاؤس، تنظیم و صحافتی برادری نا آسودہی کن غٹ ممکن گام گیج کینہ۔ بنجائی وزیر پیکا آرڈیننس 2016 آ غٹ اسٹیک ہولڈر آتون سلابت کننگ نا پڑو کرے۔ اونا پاننگ ئس کہ ملک انا مثبت دروشم ءِ تالان کننگ کن سوشل میڈیا ءِ فعال کننگک و ریاست و اونا ادارہ غاتا برخلاف منفی پروپیگنڈا کروک آتون سختی اٹ مون تننگک ۔ اوپارے کہ ملکی شونداری و حکومت نا اہم شونداری ڈٹ آتے مون آ دننگ کن وزارت حوالکاری و شینکاری نا کڑد اہمیت تخک، ڈرامہ و فلم انڈسٹری نا مون آ دننگ کن ہرممکن گام گیج کینہ۔ بنجائی وزیر حوالکاری و شینکاری پی ٹی وی و اے پی پی تون اوار وزارت نا غٹ اہم ادارہ غاتیا داوخت آ ملک انا ساڑی سیاسی و زرگزرانی حالیت آتیٹی الس ءِ سہی معلومداری نا فراوانی کن بھلو زمواری اس مریک ، وزارت حوالکاری نا الس ءِ مستند معلومداری و خبر آتا فراوانی ٹی اہم کڑد ءِ فراموش کننگ مفک۔ اودااومیت نا درشانی ءِ کرے کہ وزارت حوالکاری نا غٹ ادارہ غاک السی فائدہ نا رداٹ تینا کسبی امو رءِ گچین وڑاٹ سرایترہ۔ اوناپاننگ ئس کہ وزارت حوالکاری و میڈیا ادارہ غاتا نیام اٹ رابطہ غاتا مون آ دننگ ننا اولیت ءِ۔ داوخت آ سیکرٹری حوالکاری ، ایم ڈی پی ٹی وی و ایم ڈی اے پی پی تون اوار وزارت نا ایلو بڑزکو آفیسر آک ہم ساڑی ئسر۔
