بیجنگ۔ 19 اپریل (اے پی پی) چین اٹی پاکستان نا سفیر معین الحق پارینے کہ چین و پاکستان نا نیام اٹ چٹان آنبار سوگو سنگتی ہر آزمائشت آ پورو سلوک و ابدی ءِ و پاکستان اٹی حکومت یا سرکڑدہ ئی ٹی بدلی آن ایڑتر ہڑتوم آ ملک آتا تعلقداری تا اہمیت آ پاکستان اٹی پورو قومی امنائی سلاہ ءِ۔ اوچینی اخبار گلوبل ٹائمز ءِ انٹرویو اٹی پارے کہ چین نا متکن آ سنگت نا وڑاٹ پوسکن گچین مروک وزیراعظم شہباز شریف چیف پاکستان اقتصادی راہداری (سی پیک) ڈٹ، کورونا دین آن پد پاکستان نا اقتصادی بحالی، دہشت گردی نا برخلاف جنگ و اوغانستان اٹی اقتصادی شونداری نا بابت چین اتون کمکاری ءِ سوگو کننگ نا چاری ءِ۔ اوپارے کہ وزیراعظم محمد شہباز شریف پاکستان نا سرکڑدہ سیاست دان نا حیثیت اٹ پاک چین سنگتی ءِ سوگو کننگ کن بھلو خذمت اس سرتسنے و اوسی پیک نا چندی ڈٹ آتے پورو کننگ کن چینی حکومت تون اواری اٹ کاریم کرینے۔ اوپارے کہ شہباز شریف سی پیک ڈٹ آتا وخت آ پوروی کن تینا پکا عزم اکن مشہور ءِ۔ اوبطور وزیراعلیٰ پنجاب نئے بیرہ سیاسی کمک فراوان کرے بلکن پنجاب اٹی انفراسٹرکچر و توانائی نا غٹ ڈٹ آتا سخت چاروکی و ترندی اٹ عملدرآمد ہم کرے و ہنداخہ آخا پاکستان نا پوسکن آ حکومت سی پیک نا ڈٹ آتے اولیت ایتک۔ اوپارے کہ سی پیک نا اولیکو ریسہ نا اہم ڈٹ مین لائن۔Iو توانائی نا اہم پلانٹ آتا پوروی آن بیدس، ننا صنعتی پیدوار ءِ پین متحرک کننگ کن خصوصی اقتصادی زون تے وخت آن مست فعال کننگ و انفارمیشن کمیونیکیشن ٹیکنالوجی، سائنس و ٹیکنالوجی و کشت وکشار اٹی گچین کمکاری آن بڑزکو آب انا شونداری حکومت نا اولیت مریک۔
