اسلام آباد۔ 18 اپریل (اے پی پی) وزیراعظم محمد شہباز شریف تون ڈپٹی چیئرمین پلاننگ کمیشن جہانزیب خان دوشنبے نادے آ داڑے اوڑدہی کرے۔ وزیراعظم آفس نا میڈیا ونگ انا کنڈآن جاری بیان نا رداٹ اوڑدہی ٹی وزیراعظم ءِ سلنگ نا گواچی شونداری ڈٹ آتا بابت معلومدار کننگا۔ وزیراعظم السی آسودہی ڈٹ آتے اولیتی بنداو تیا پورو کننگ نا پارت کرے۔ اوپلاننگ کمیشن ءِ پین فعال کننگ نا پارت ہم کرے۔ وزیراعظم پارے کہ جامع ڈٹ بندی آن پبی پالیسی تا ٹہیفنگ و پالیسی تا چرجوئی آن ملکی زرگزرانی و اقتصادی شونداری ءِ پک کینہ۔ اوپارت کرے کہ وزارت آک و ڈویژن آک تین پہ تینی کمکاری ءِ پک کیر۔ اوپارے کہ السی آسودہی ڈٹ آک پین مجرمامہ لاپرواہی و گوجالنگ نا گواچی مفسہ، شونداری نا سفر ہموکان بناکرینے، ہراکان سلوک ئس۔ ملک و قوم انا اسہ روپئی اسے ہم زیان مننگ کن اِلیپنہ۔
