اسلام آباد۔ 16 اپریل (اے پی پی) وزیراعظم محمد شہباز شریف پارینے کہ مسکوہی حکومت نا بے وڑی و نابودی نا سوب آن ملک اٹی لوڈشیڈنگ مننگ ءِ، بجلی نا کچ ننا گرج آن زیات ءِ ، وخت آ گیس و ایندھن نا ہلپننگ نا سوب آن ویل مون آ بس۔ ہفتہ نادے آ قومی اسمبلی ٹی گپ وتران کرسا وزیراعظم پارے کہ دا وخت آ مچ آ ملک اٹی لوڈشیڈنگ برجاءِ۔ تدوک آ مسہ دے آن ای تینا سنگت آتون وزارت پیٹرولیم و وزارت پاور نا کارندہ غاتون اوڑدہی کریٹ ہراٹی معلوم مس کہ ملک اٹی 35 ہزار میگاواٹ بجلی نا کچ ساڑی ءِ ہراٹی 6 ہزار میگاواٹ پن بجلی نا کچ ءِ۔ پن بجلی آن اسہ کنڈ مرسا ہم ننا کچ داخس ءِ کہ مچ آ ملک انا گرج ءِ پورو کننگ مریک۔ بدبختی اٹ ہرا پلانٹ سی پیک نا نتیجہ ٹی لگا او زیات تر کولا، سولر و ونڈآمبنی ئسر وخت اس کہ 5 ہزار میگاواٹ ایل این جی نا بنداو آ خلنگا۔ دافتیان اسہ پلانٹ اس 2019ء ٹی چلینگوئی ئس ہرانا کچ 1250 میگاواٹ ئس، دا ڈٹ داسکان پورو متنے انتئے کہ دانا فنانشنل کلوز متنے۔ دا10 ارب آن زیات نا ڈٹ اس ئس، مسکوہی حکومت داڑآ ہچ ءُ چکار اس تتو و نئے اونا حواریک داڑآ چکار کریر۔ اوپارے کہ ہرا پوسکن آ پلانٹ آک لگانو او گیس و تیل مفننگ نا سوب آن بند ءُ، ہرانا سوب آن ملک اٹی لوڈشیڈنگ ءِ۔ وزیراعظم پارے کہ بدانتظامی و نابودی نا سوب آن دا ویل آک ودی مسنو۔ داوڑنا نابود و کرپٹ حکومت اس اسُل بتنے۔ ملک اٹی گیس اف، نن تیل انا باندات آتے ہم ہُننگ اُن۔ تعلقدار وزارت آتون دیوان اٹی، ای اوفتیان اریفیٹ کہ ہراتم گیس مسہ ڈالر فی یونٹ آ ئسک تو نم انت اکن ہلتویرے۔ اینو او نہاد 30 آن 35 ڈالر فی یونٹ آٹے ۔
