اسلام آباد۔ 16 اپریل (اے پی پی) وزیراعظم شہباز شریف تون جمعیت علمائے اسلام (ف) نا سروک مولانا فضل الرحمان ہفتہ نادے آ داڑے وزیراعظم ہاؤس اٹی اوڑدہی کرے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف وزیراعظم ہاؤس آ بننگ آ مولانا فضل الرحمان ءِ بخیر کرے۔ مولانا فضل الرحمان شہباز شریف ءِ وزارت عظمیٰ نا منصب ءِ سنبھالنگ آ مبارکبادی ترسا پارے کہ نا کماشی ٹی اجتماعی دانش و کوشست ملک و قوم ءِ مشکل آتیان کشانے۔ وزیراعظم مولانا فضل الرحمان ءِ خراج تحسین پیش کرے۔ مولانا فضل الرحمان وزیراعظم شہباز شریف نا السی خذمت و ویل آتا ایسری نا جوزہ نا ستاءِ کرسا پارے کہ نی بننگ تون قوم ءِ نشان تسوس کہ اوفتا خادم امر کاریم کیک۔ اووزیراعظم ءِ باور کرفے کہ ملک وقوم انا خیرخواہی کن ننا پبی کمکاری و کمک نیتون ءِ و مریک۔ ہڑتوم آ راہشونک اہم سیاسی امور و کابینہ نا جوڑ کننگ نا بابت باندات آ سلابت ہم کرے۔
