اسلام آباد۔ 16 اپریل (اے پی پی) پاکستان مسلم لیگ (ن) نا ترجمان مریم اورنگزیب پارینے کہ پنجاب اسمبلی نا پریس گیلری ٹی جیمر آتا خلنگ صحافی تے اوفتا کسبی فرض آن توننگ نا کوشست اسے ، پونا چار سال اسکان پی ٹی آئی میڈیا غا پابندی خلسا کرے، سینسر شپ کرے، صحافی و میڈیا ورکرآتیا ظلم کرے، اینو اسہ بھلو الیکشن اس مننگ ءِ و صحافی تے اوفتا زمواری تیان توننگ کن جیمر خلنگانے، نن دا عمل نا مذمت ءِ کینہ و خواست کینہ کہ پنجاب اسمبلی نا پریس گیلری آن جیمرآتے دمدستی اسہ کنڈ کننگے۔ ہفتہ نادے آ پنجاب اسمبلی ٹی جیمر خلنگ نا بابت گپ وتران کرسا ترجمان مسلم لیگ (ن) مریم اورنگزیب پارے کہ پنجاب اسمبلی نا پریس گیلری ٹی جیمر خلنگانے، ملوک آ فوٹیج میڈیا تون شیئر ہم کننگک۔ اوپارے کہ پاکستان تحریک انصاف پونا چار سال اسکان میڈیا غا پابندی خلسا کرے، سینسر شپ کرے، صحافی و میڈیا ورکرآتیا ظلم کننگا، اینو اسہ بھلو الیکشن اس مننگ والا ءِ و جیمر خلسا میڈیا ءِ صحافتی زمواری تیان توننگ نا کوشست کننگ انگ ءِ۔ اوپارے کہ داکان مست ہم ہراتم دا گچین کاری مسکہ ہمودے آ ہم میڈیا ءِ تہہ ٹی بننگ نا موکل الوکہ۔ اوپارے کہ پنجاب اسمبلی نا پریس گیلری ٹی جیمر لگوک مریک تو میڈیا انت اس رپورٹ کیک؟ اوپارے کہ جیمر خلنگ نا مسخت ہندادے کہ اسمبلی ٹی ہرا حرکت کننگ نا داکوشست کیرہ او میڈیا رپورٹ کننگ کپ ۔
