اسلام آباد۔ 16 اپریل (اے پی پی) راول چوک فلائی اوور ڈٹ ءِ یکم ستمبر اسکان پورو کننگے، ڈٹ انا لینڈ سکیپنگ ءِ کننگے و ہرے نا سوب جوڑ مروک آ کمپنی تے بلیک لسٹ کننگے۔ داخیال آتا درشانی ءِ وزیراعظم محمد شہباز شریف ہفتہ نا سہب اتون راول چوک فلائی اوور ڈٹ انا دورہ کرسا کرے۔ داوخت آ وزیراعظم ءِ ڈٹ آ سرجم حوال ہم تننگا۔ وزیراعظم شہباز شریف شونداری ڈٹ آتا پوروی ٹی ہرے آ تاسف نا درشانی ءِ کرسا اونا وخت آ و زوت آن زوت پوروی نا پارت کرے۔ اوپارے کہ شونداری ڈٹ آتیٹی تھرڈ پارٹی ویلی ڈیشن ءِ پک کننگے و ڈٹ آتا پوروی ٹی ہرے نا سوب جوڑ مروک کمپنی تے بلیک لسٹ کننگے۔ اوپارے کہ قومی وسیلہ غاتا زیان و شونداری ڈٹ آتیٹی ہرے ءِ سگنگ پننگک۔ پروجیکٹ انتظامیہ نا کنڈآن حوال اٹی وزیراعظم شہباز شریف ءِ پاننگاکہ راول چوک فلائی اوور ڈٹ اٹی بے سوب ہرے کننگا تانکہ اونا خڑچ ءِ ودفنگ مرے ولے بنجائی دارالحکومت اٹی ایلو ڈٹ آتا کنٹریکٹ ایف ڈبلیو او و این ایل سی ءِ تننگانے تانکہ اوفتا وخت آ پوروی ءِ پک کننگ مرے۔ وزیراعظم شہباز شریف پارت کرے کہ شونداری ڈٹ آتے وخت آ پورو کننگے۔ اوپارے کہ تدوک آ کیہی تُو آن ہراتم کہ اسلام آباد آ بسٹ تو شونداری ڈٹ آتا سست روی ءِ خناٹ است ہسونی مس۔ دا بابت تعلقدار کمامدار آتے خصوصی چکار کروئی مریک انتئے کہ نیزگار قوم انا پیسہ غاتا زیان ءِ سگنگ پننگک۔ اوپارت کرے کہ احساس زمواری ءِ پک کننگے، تھرڈ پارٹی ویلی ڈیشن ءِ پک کرسا ڈٹ آتا شفافیت ءِ پک کننگے۔ دا بابت ہچ ءُ رعایت اس کننگپک۔ وزیراعظم راول چوک فلائی اوور ڈٹ انا تھرڈ پارٹی ویلی ڈیشن ءِ پارت کرسا کمیٹی اس ٹہیفنگ نا پرمان کرے و پارے کہ اونا انکوائری ءِ کرفنگے تانکہ ہرے نا سوب آتے معلوم کننگ مرے و زمواری تے سزا تننگ مرے۔ وزیراعظم ڈٹ انا ہرے آ است ہسونی نا درشانی ءِ کرسا پارے کہ اسہ چنکو ڈٹ اس ہم اِرا سال اٹی پورو مننگ کتو وخت اس کہ دا وخت اٹی تو میگاپروجیکٹ پورو مننگ کریکہ۔ وزیراعظم شہباز شریف ڈٹ انا لینڈ سکیپنگ نا بارواٹی ہم اَریفے و پارے کہ دانا لینڈ سکیپنگ ءِ ہم پک کننگے۔ اوڈٹ ءِ یکم ستمبر 2022 اسکان المی پورو کننگ نا پارت کرے و پارے کہ ڈٹ انا کوالٹی آ ہچ ءُ سمجھوتہ اس کننگپک۔ یات سلے کہ راول چوک فلائی اوور ڈٹ انا بنااکتوبر 2020 اٹی مسوسس و دادے اِرا سال اٹی پورو مروئی ئسک۔ ڈٹ انا ہرے نا سو ب آتے چٹفسا دادے وخت آ پورو کننگے۔ وزیراعظم شہباز شریف شونداری ڈٹ آتا ہرے ءِ سگپک و ہندا سوب ءِ کہ او ڈٹ انا ہرے آ ترندی نا درشانی ءِ کرے ۔ ڈٹ آ 48 درسد کاریم مسنے۔
