اسلام آباد۔ 15 اپریل (اے پی پی) پاکستان مسلم لیگ (ن) نا ترجمان مریم اورنگزیب احساس پروگرام و پناہ گاہ تے بند کننگ نا خبر آتے دروغ اس گوندسا پارینے کہ شہباز شریف وزیراعظم گچین مننگ آن پد قومی اسمبلی ٹی اولیکو تران اٹی پیدوار کریسس کہ السی خذمت نا ڈٹ آک برجاسلرہ۔ جمعہ نادے آ تینا اسہ بیان اسے ٹی اوپارے کہ بے نظیر انکم سپورٹ پروگرام نئے بیرہ برجاسلک بلکن اودے پین ودفنگک، وزیراعظم شہباز شریف بے نظیر انکم سپورٹ پروگرام ءِ مار و مسن تا تعلیم نا ذریعہ جوڑ کننگ نا فیصلہ کرینے، ہچ ءُ پروگرام اس بند متنے، الس نا خیرخواہی نا ہر ڈٹ ءِ پین گچین کینہ انشاء اللہ۔ اوپارے کہ مسکوہی وزیراعظم نواز شریف نا بناکروک جان جوڑی کارڈ ہندا وڑ چلینگسا کیک، اودے پین گچین کینہ، دا دروغ ءِ ہموفک تالان کننگ ءُ ہرافتے وزیراعظم نا کرسی و کنٹینر آ دروغ تڑنگ نا عادت ءِ۔ مریم اورنگزیب پارے کہ میڈیا آن ہم خواست ءِ کہ او داوڑنا بے سٹی آ حوال آتے جاگہ تننگ آن پاناد کے۔ اللہ تعالیٰ نا شکر ءِ کہ اینو ملک اٹی اسہ گچین مروک ءُ وزیراعظم اسے ہرا الس نا ڈکھ و دڑد ءِ پہہ مریک، اینو ملک اٹ ہندن ءُ گچین وزیراعظم اسے ہرا الس کن است انا بھلنی و اوفتا خذمت نا جوزہ تخک، اینو ملک اٹ ہندن ءُ وزیراعظم اسے ہرا السی و قومی سلامتی نا باندات آتے تینا سیاست کن کاریم اٹ اتپک۔
