اسلام آباد۔ 14 اپریل (اے پی پی) وزیراعظم شہباز شریف پشاور موڑ آن نیو اسلام آباد ایئر پورٹ میٹروبس ڈٹ انا دورہ ءِ کرے و ڈٹ اٹ ہرے نا جاست وپاست نا پرمان و مخلوق ءِ سفر نا گچین و آب اٹ آسراتی تا فراوانی کن بہارہ کہو و روات نا روٹ آتیا ہم میٹرو بس چلیفنگ کن دمدستی فزیبلٹی اس تیار کننگ نا پارت کرینے۔ پنچ شنبے نادے آ وزیراعظم سہب انا ہفت بجہ غا میٹرو بس سروس آ جاری کاریم نا جاچ ءِ ہلنگ کن پشاور موڑ میٹروبس نا سائٹ آ سرمس۔ مسلم لیگ (ن) نا راہشون احسن اقبال ، انجم عقیل خان، حنیف عباسی ، ڈاکٹر طارق فضل چوہدری و مریم اورنگزیب ہم اوڑتون اوار ئسر۔ وزیراعظم ءِ سی ڈی اے و این ایچ اے نا کمامدارآک ڈٹ انا بابت سرجم حوال تسر۔ وزیراعظم ءِ پاننگاکہ ہفتہ غان 15 بس دا روٹ آ چلینگ بناکیک، 5 مئی اسکان 30 بس پین سرمریک، دا ڈٹ ءِ 2018ء ٹی پورو مروئی ئسک ولے تاخیر نا گواچی مس۔ وزیراعظم ڈٹ اٹی تاخیر آ ناراضگی نا درشانی ءِ کرے وپارے کہ 16 ارب روپئی خڑچ مسنے ولے داخہ بھلو وخت اسے آن دا ڈٹ پدسلنگ نا گواچی مسنے ہرا است ہسونی نا ہیت اسے۔ ڈٹ اٹی تاخیر نا ہچ ءُ سوب اس مفک۔ وزیراعظم پارت کرے کہ تاخیر نا جاست و پاست کرفنگے و دامسخت کن کمیٹی اس ٹہیفنگے۔ اوپارے کہ دا ڈٹ آن مخلوق ءِ ایئر پورٹ اسکان ہن و بر اٹی بھاز آسانی مریک۔ وزیراعظم پارت کرے کہ موٹروے آ ہم اسہ میٹرو اسٹیشن اس جوڑ کننگے، موٹروے آ اگہ میٹرو اسٹیشن اس مفک تو دا مچ آ ڈٹ انا مخلوق ءِ فائدہ مفک۔ وزیراعظم پارے کہ الیکٹرانک ٹکٹنگ نا عمل ہراتم اسکان پورو مفک ٹکٹ آتا بناءِ مینوئل وڑاٹ کننگے و روچہ مبارک اٹی مفت میٹرو بس چلیفنگے تانکہ دا مقدس آ تُو اٹی شاری تے آسراتی دوئی مرے۔ وزیراعظم پارت کرے کہ ایئر پورٹ آ ہنوک آ مسافر آتا گڑاتیکن بس آتیٹی گڑاتخنگ نا آسراتی تننگے، السی فائدہ نا ڈٹ آتے زوت بایدے پورو کننگے۔ وزیراعظم اسلام آباد و ایب وکیب نا شاری تے آب اٹ و گچین سفری آسراتی تا فراوانی کن بہارہ کہو و روات نا روٹ آتیا میٹرو بس چلیفنگ کن دمدستی فزیبلٹی اس تیار کننگ نا پارت کرے۔ وزیراعظم میٹرو بس اٹ سفر ہم کرے و برجاکاریم نا معائنہ ءِ کرے۔
