اسلام آباد۔ 14ا پریل (اے پی پی) سروک پاک بحریہ ایڈمرل محمد امجد خان نیازی پی اے ایف ایئر وار کالج انسٹیٹیوٹ فیصل نا دورہ ءِ کرے۔ ایئر وائس مارشل حسین احمد صدیقی، صدر ایئر وار کالج انسٹیٹیوٹ اودے بخیر کریر۔ سروک پاک بحریہ پی اے ایف ایئر وار کالج انسٹیٹیوٹ نا ٹیم ءِ فضائی جنگ انا پوسکن آ چیلنج آتون مون تننگ کن بڑزکو درجہ نا تعلیمی آب انا دوئی کننگ آ مبارکبادی تس۔ پاک فضائیہ نا ترجمان نا رداٹ ایئر وار کورس انا بشخ ہلوک آتیان تران کرسا سروک پاک بحریہ لمہ وطن نا دفاع و سلامتی کن پاکستان نا سلہہ بند فوج انا کڑد و قربانی تے زبردست خراج تحسین پیش کرے۔ اوپارے کہ نن پوسکن آ ٹیکنالوجی آن باخبر رہینگسا گرے ہائبرڈ جھیڑہ و سائبر وار فیئر تون مون تننگ کن ہروخت تیار مرین۔ اونا مستی پاننگ ئس کہ ساڑی آ دور انا جنگ اٹی بدلی نا رداٹ اسیجائی فوجی آپریشن آن بیدس فوجی مسخت آتے دوئی کننگ مفک۔ پی اے ایف ایئر وار کالج انسٹیٹیوٹ ، اسلام آباد پاک فضائیہ نا اسہ باوقار ءُ ادارہ اسے، ہراڑے پاکستانی سلہہ بند فوج و سنگت ملک آتا آفیسر آک اہم کمانڈ وا سٹاف نا تقرری کن تربیت دوئی کیرہ۔ کورس انا بشخ ہلوک آتے سد آن زیات سرحال آتا چاہندار آتا سلاہ غان روشناس کرفنگک ہرافتے ٹی سول و فوجی چاہندار، سفارتکار، اسکالر، وکیل، صنعتکار، سائنسدان ، ماہر اقتصادیات و میڈیا شخصیت آک قابل ذکر ءُ۔ کورس ءِ جامع تعلیمی وسعت تننگ کن جہانی استاد و حکمت عملی نا چاہندار آتون گپ وتران ءِ ہم پک کننگک۔
