اسلام آباد۔ 14 اپریل (اے پی پی) پاکستان مسلم لیگ (ن) نا ترجمان مریم اورنگزیب پارینے کہ مسکوہی وزیراعظم عمران خان آئین آ جلہو و آئین شکنی نا بھلو ڈوہ اس کرینے، عمران خان بیست ءُ دو کروڑ الس و آئین ءِ یرغمال کرے ہرانا سزا آرٹیکل 6 ءِ۔ پنچ شنبے نادے آ تینا اسہ بیان اسے ٹی عمران خان نا تران آ ردعمل نا درشانی ءِ کرسا مریم اورنگزیب پارے کہ عدالت آک داخاطرآن ملنگار تانکہ آئین وکانود آ عمل مرے، عدالت آک داخاطرآن ملنگار انتئے کہ نی عدالت تون دروغ تڑیس ، عدالت آک داخاطرآن ملنگار تانکہ نے سماتمے کہ ملک آئین نا رداٹ چلینگک، نا پرمان و است خواہی آ آخا، عدالت آک داخاطرآن ملنگار انتئے کہ نی آئین و پارلیمنٹ ءِ یرغمال کریسس۔ اوپارے کہ عمران خان صاحب دا ملک بیست ءُ دو کروڑ مخلوق نا امانت ءِ ، او نا غلام افس، ہنداخاطرآن عدالت آک نن نیمہ غا ملنگار۔ اوپارے کہ دھڑکو تننگ، سوج کننگ آن زیات گچین مریک کہ نی قوم آن تینا ڈوہ انا بشخنداری خواہ، ہر ہنوک آ دے اتون نا حقیقت، کرپشن و لٹ وپل بے نقاب مننگ ءِ و پین پیاش مریک۔ اوپارے کہ پونا چار سال الس نا نت، بورہ، سی، دوائی، بجلی، گیس ، کھد دُزی کرے، الس نا پیسہ غاتے بھس کرے، دادے نا ڈوہ، الس کبینی ، بجلی گیس نا لوڈشیڈنگ آن کسکرہ۔
