اسلام آباد۔ 14 اپریل (اے پی پی) پاکستان مسلم لیگ (ن) پارینے کہ وزیراعظم محمد شہباز شریف پشاور موڑ آن نیو اسلام آباد ایئرپورٹ اسکان میٹرو بس سروس ڈٹ اٹی پنچ سال انا تاخیر نا جاست وپاست و ڈیوالئی نا زموار آتا تعین ءِ کننگ کن پرمان کرینے۔ مسکوہی حکمرانی پونا چار سال انا نالائخی و نابودی ءِ ڈکھنگ کن درملکی سازش نا دروغ تڑنگ ءِ، اودے نشان تننگ و پاننگ کن پین ہچ اس اف، پنچ شنبے نادے آ اسہ بیان اسے ٹی مریم اورنگزیب پارے کہ وزیراعظم محمد شہباز شریف 7 بجہ غا اسلام آباد میٹرو بس سروس آ برجاکاریم نا جاچ ءِ ہلنگ کن پشاور موڑمیٹروبس نا سائٹ آ سرمس۔ اوپارے کہ دا ڈٹ مسکوہی وزیراعظم محمد نواز شریف نا دور اٹی 2017ٹی بناکریسس ہرادے 2018 ء ٹی پورو مروئی ئسک داٹی 5 سال انا تاخیر مس و ڈٹ آ کاریم پورو متو۔ مریم اورنگزیب پارے کہ وزیراعظم محمد شہباز شریف ڈٹ آ تاخیر آ جاست وپاست کرفنگ نا پرمان کرینے و ڈیوالئی نا زموار آتا تعین ءِ کننگ نا پارت کرینے۔ مریم اورنگزیب پارے کہ وزیراعظم روچہ مبارک اٹی میٹروسروس شاری تیکن مفت چلیفنگ نا پرمان کرینے، روچہ نا مقدس آ تُو اٹی شاری مفت سفری آسراتی دوئی کیرہ۔ اوپارے کہ وزیراعظم اسلام آباد میٹرو ءِ مسہ کسر آتیان موٹروے تون گنڈنگ نا دمدستی فزیبلٹی نا تیاری نا پرمان ہم کرینے و بارہ کہو، پشاور موڑ و روات نا روٹ آتیا میٹرو چلیفنگ کن دمدستی فزیبلٹی اس تیار کننگ نا پارت کرینے۔ مریم اورنگزیب پارے کہ وزیراعظم اسلام آباد و ایب و کیب انا شاری تے گچین و آب اٹ سفری آسراتی تے پک کننگ نا پارت کرینے۔
