کوئٹہ۔ 14 اپریل (اے پی پی) وزیر جان جوڑی بلوچستان سید احسان شاہ پارینے کہ بلوچستان اٹی الس ءِ جان جوڑی نا گچین آسراتی تا فراوانی کن غٹ وسیلہ غاتے کاریم اٹ اتنگ انگ ءِ، صوبائی حکومت و محکمہ جان جوڑی ڈبلیو ایچ او تون اوار ایلو پارٹنر آتا جان جوڑی نا آسراتی نا فراوانی ٹی کمک کننگ آ منت وار اُن، ٹی بی کنٹرول پروگرام کن موٹرسائیکل و ای پی آئی کن ایمبولینس و کولڈ چین ٹرک تننگ آن مر مر انگا علاقہ غاتیٹی آسراتی تا فراوانی ٹی کمک رسینگک ۔ داہیت ءِ او ای پی آئی سینٹر کوئٹہ اٹی ڈبلیو ایچ او نا کنڈآن ٹی بی کنٹرول پروگرام بلوچستان کن ایمبولینس ، کولڈ چین ٹرک، موٹرسائیکل تننگ نا دود آن تران کرسا پارے۔ دود آن پاکستان اٹی سروک ڈاکٹرپالیتھاماہیپلہ، سیکرٹری جان جوڑی بلوچستان صالح محمد ناصر ، ڈی جی ہیلتھ ڈاکٹر نور محمدقاضی، ٹی بی کنٹرول پروگرام نا صوبائی منیجر ڈاکٹر آصف شاہوانی ئسک ہم تران کریر۔ دود اٹی ٹی بی کنٹرول پروگرام نا ڈپٹی منیجر ڈاکٹر خرم ہادی، ڈاکٹر سمیع کاکڑ، ای پی آئی نا پروانشنل کوآرڈی نیٹر ڈاکٹراختر بلیدی، ڈبلیو ایچ او نا ڈاکٹر اسفند یار شیرانی، ڈپٹی منیجر ڈاکٹر عامر رئیسانی ، ڈاکٹر احمد ولی ئسک ہم ساڑی ئسر۔ صوبائی وزیر جان جوڑی سید احسان شان پارے کہ صوبائی حکومت و محکمہ جان جوڑی بلوچستان نا مر انگا علاقہ غاتیٹی الس ءِ جان جوڑی نا آب اٹ و گچین آسراتی تا فراوانی کن کوشست کننگ ءُ، بلوچستان نا غٹ ڈسٹرکٹ اٹی جان جوڑی نا آسراتی اولیت آتیٹی اوار ءِ ہراٹی ہچ وڑنا ڈیوالئی ءِ سگنگ پننگک۔ اوپارے کہ صوبائی حکومت و محکمہ جان جوڑی ڈبلیو ایچ او و ایلو درملکی پارٹنر آتا کنڈآن الس ءِ جان جوڑی نا آسراتی تا فراوانی ٹی محکمہ جان جوڑی بلوچستان نا کمک کننگ آ منت وار اُن۔ اوپارے کہ محکمہ جان جوڑی نا غٹ وارٹیککل پروگرام تیکن فنڈ آتا فراوانی ءِ پک کننگک۔ ڈبلیو ایچ او نا پاکستان اٹی سروک ڈاکٹر پالیتھا ماہیپلہ پارے کہ کورونا دین انا جہانی دین اٹی پوسکن آ چیلنج مون تروک ئسک روایتی طبی سروس آن اسہ کنڈ اول سرآن حکمت عملی اس مون آ اتنگا و محکمہ جان جوڑی بلوچستان کوویڈ نا دین ءِ کنٹرول کننگ کن گچین گام گیج کرے ہرا سفت نا قابل ءِ۔ اوپارے کہ ڈبلیو ایچ او نا کنڈآن مر مر انگا علاقہ غاتیٹی جان جوڑی نا آسراتی تا فراوانی ءِ پک کننگ کن ٹی بی کنٹرول پروگرام کن بلوچستان چندی ڈسٹرکٹ کن 34 موٹرسائیکل و ای پی آئی کن 6 ایمبولینس، 2 کولڈ چین ٹرک فراوان کننگ انگ ءِ۔ اوپارے کہ ڈبلیو ایچ او بلوچستان نا الس ءِ جان جوڑی نا آسراتی تا فراوانی ٹی تینا کمکاری ءِ برجاتخک۔ سیکرٹری جان جوڑی صالح محمد ناصر پارے کہ طبی آسراتی تا آب و دنگ ءِ لس بندغ نا دسترس اسکان اتنگک گچین اصلاحات نا کمک اٹ گچین طبی سروس آتا فراوانی نا عمل لس بندغ ءِ محسوس مریک۔ ڈی جی ہیلتھ ڈاکٹر نور محمد قاضی پارے کہ وزیر جان جوڑی بلوچستان سید احسان شاہ و سیکرٹری جان جوڑی صالح محمد ناصر نا پارت آ صوبہ نا مر مر انگا علاقہ غاتیٹی الس ءِ آب اٹ طبی آسراتی تا فراوانی کن کوشست کننگ ءِ ہراڑکن غٹ دوئی وسیلہ غاتے کاریم اٹ اتنگ انگ ءِ۔ ٹی بی کنٹرول پروگرام بلوچستان نا منیجر ڈاکٹر آصف شاہوانی پارے کہ ٹی بی کنٹرول پروگرام مچ آ بلوچستان نا صوبہ ٹی ٹی بی نا ناجوڑ آتا تشخیص و اوفتے مفت درمان نا آسراتی فراوان کننگ کن ہرممکن گام گیج کننگ ءِ۔ اوپارے کہ تدوک آ سال بلوچستان ٹی بی کنٹرول پروگرام 11656 نا خڑک ناجوڑ آتیٹی ٹی بی نا تشخیص کرسا اوفتے درمان نا مفت آسراتی فراوان کرے ۔ اوپارے کہ اینخو سال 2022ء ٹی وزیراعلیٰ بلوچستان میر عبدالقدوس بزنجو ، صوبائی وزیر جان جوڑی سید احسان شاہ ، سیکرٹری جان جوڑی صالح محمدناصر، ڈائریکٹر جنرل جان جوڑی بلوچستان ڈاکٹر نور قاضی نا پارت آتے مون آ تخسا اسہ پوسکن ءُ عزم اسے تون ٹی بی نا چٹفنگ کن کاریم کننگ اُن و ننا کوشست ءِ کہ بلوچستان ءِ ٹی بی نا ناجوڑی آن پاک کننگے۔
