کوئٹہ۔ 14 اپریل (اے پی پی)بلوچستان عوامی پارٹی نامرکزی راہشون و مسکوہی صوبائی وزیر ثوبیہ کرن کبزئی پارینے کہ ملک اٹی ودوک آ سیاسی بے سگی و ملک انا سلامتی ناادارہ ، پاکستان نا فوج انا برخلاف مہم بھلو گڑتی اسے،پاک فوج و عدلیہ نا کڑد ءِ مچ آ ملک انا الس قدر انا نظر اٹ ہرک، منہ شرپسند زموار آتا کنڈآن پاک فوج و عدلیہ آ منفی تنقید ہچ ءُ حالیت اسے ٹی قابل قبول اف حکومت دمدستی وڑاٹ پاک فوج و عدلیہ غا سوشل میڈیا نا کمک اٹ تنقید کروک آتا برخلاف کارروائی کے۔ داڑے جاری مروک اسہ بیان اسے ٹی ثوبیہ کرن کبزئی پارے کہ پاکستان نا الس پاک فوج و عدلیہ نا است اٹ شرف ءِ کیک و تدوک آ دے تیٹی عدلیہ نا کنڈآن مسکوہی حکومت نا غیر آئینی گام ءِ کالعدم گوندنگ نا فیصلہ غان ملک اٹی جمہوریت سوگو مسنے۔ اوپارے کہ پاک فوج ملک آن دہشت گردی نا چٹفنگ و الس نا جان و مال انا رکھ اکن تینا جان تے ندر کرینے و ملک اٹی مدام جمہوریت تون تفینے ولے گڑاس شرپسند زموار پاک فوج و عدلیہ غا سوشل میڈیا غا بے گرج تنقید کننگ ءُ ہرانا حقیقت تون ہچ ءُ تعلق ا س اف۔ اوپارے کہ بنجائی حکومت و ایف آئی اے پاک فوج و عدلیہ غا بے گرج تنقید کروک آتا محاسبہ ءِ کرسا اوفتے اوفتا کروک نا سزا ایتفر۔
