کوئٹہ۔ 14 اپریل (اے پی پی) پاکستان مسلم لیگ (ن) بلوچستان ناسینئر نائب صدر نواب سلمان خان خلجی پارینے کہ مسلم لیگ (ن) نا صدر میاں شہباز شریف نا بطور وزیراعظم پاکستان سرسہبی ملکی شونداری نا دشمن واکدار تا بوز آ چپانٹ اسے ، وزیراعظم پاکستان میاں محمد شہباز شریف نا کماشی ٹی الس نا مشکل آتیٹی کمتی بریک و بلوچستان نا الس اٹ مروک آ احساس محرومی چٹک و صوبہ ءِ شونداری نا لحاظ اٹ ایلو صوبہ غاتا بریبر اتنگک۔ داہیت ءِ او پنچ شنبے نادے آ تینا دفتر اٹی اوڑدہی کروک آ مسلم لیگ (ن) نا کارندہ غاتا اسہ ڈل اسے تون گپ وتران کرسا پارے۔ نواب سلمان خان خلجی پارے کہ مسکوہی نابود عمران نیازی حکومت ملک ءِ بھسکاری نا دنگ آ سرکرے و زرگزران نا بیڑہ ءِ غرق کرے ملک انا بھاگ دوڑ داسہ سہی دوتیٹی بسنے ، میاں محمد شہباز شریف نا کماشی ٹی وطن عزیز شونداری نا مزل آتے طے کیک۔ اوپارے کہ تحریک بے پتی نا سرسہبی آ 22 کروڑ الس سکون نا ساہ ہلکر، میاں محمد شہباز شریف نا وزیر اعظم پاکستان جوڑ مننگ آ مچ آ قوم ءِ مبارکبادی ایتنہ۔ اوپارے کہ مسکوہی حکومت بلوچستان ءِ بھاز بے وڑ گوجالا انشاء اللہ میاں محمد شہباز شریف بلوچستان نا شونداری و شونہالی و الس اٹ مروک آ احساس محرومی تے چٹفنگ کن عملی گام گیج کیک و بلوچستان ءِ شونداری نا لحاظ اٹ ملک انا ایلو صوبہ غاتا بریبر اتنگک۔ اوپارے کہ مسلم لیگ (ن) بلوچستان نا سرکڑدہ صوبہ ناالس نا ویل وزیراعظم و بنجائی حکومت نا مون آ تخک و دا ویل آتا ایسر کننگ کن عملی گام گیج کننگ نا خواست کیک۔ اوپارے کہ مسلم لیگ (ن) بلوچستان اٹی مروک آ بلدیاتی گچین کاری تیٹی پبی بشخ ہلیک مسلم لیگ (ن) نا کارندہ غاک بلدیاتی گچین کاری تیکن پبی تیاری کیر۔
