اقوام متحدہ۔ 13اپریل (اے پی پی) اقوام متحدہ ٹی پاکستان نا آخبتی مندوب منیر اکرم اقوام متحدہ نا بروک آسال مارچ اٹی اڈ ہلوک آ 2023 واٹر کانفرنس نا اہمیت آ زور شاغسا داہیت ءِ تالان کرے کہ پاکستان دنیا نا دیر انا کاختی نا گواچی 10 ملک آتیٹی اوار ءِ۔ اونیویارک اٹی اقوام متحدہ نا ہیڈکوارٹر آتیٹی بروک آ سال 22 مارچ آن بناکروک آ 3 دے ئی واٹر کانفرنس نا بابت حوال اٹی پارے کہ چاگڑدی بدلی و ایلو پیش رفت آتا سوب آن ننے تیرمہ ٹی نوکاپ و یخ آتیٹی خشک سالی تون مون تروئی تمک و ننے داہیت آ گڑتی ءِ کہ دنیا پائیدار شونداری نا ہدف نمر 6 ہرا ساف دیر و سفائی غٹ اکن ءِ نا بابت ءِ کہ نفاذ کن گام گیج کتنے۔ اوواٹر گورننس نا ویل داا ویل ءِ اوار کننگ نا اہمیت تون اوار چندی ملک آتا نیام اٹ وہوک آ دریا و سیم تیا واقع دیری کوڑی تا دیر آ کمکاری ءِ مون آ تخا۔ اوپارے کہ چندی ملک آتا نیام اٹ آبی کمکاری گیشتر علاقائی انضمام ، امن و پائیدار شونداری تون اوار اوار علاقائی سلامتی نا چیلنج آتون مون تننگ و موسمیاتی بدلی نا موافقت نا مخ تفی ٹی اہم کڑد ادا کیک۔ دا وخت آ مچ آ دنیا ٹی تازہ دیر انا 60 درسد چندی ملک آتیان گدرینگوک آ دریا و سیم تیا واقع جھل تیٹی ءِ مچ آ دنیا ٹی 286 دریا و جھیل و 592 ڈغار اٹی دیر انا نظام اسٹ آن زیات ملک آتا گل زمین اٹی واقع ءِ و داوڑنا ملک آتا کچ 153 ءِ۔ اوپارے کہ دنیا نا زیات دیری وسیلہ ارٹ یا ارٹ آن زیات ملک آتا نیام اٹ مشترک مننگ تون دیر انا ودوک آ کمتی نا مون ءِ توننگ کن چندی ملک آتا نیام اٹ دیری کمکاری نا دمدستی گرج ءِ و دا چرجوئی ٹی 3 گڑا مالی کمکاری، ٹیکنالوجی کمکاری و پارٹنر شپ بھاز اہم ءِ۔ اوپارے کہ ننے خوشی ءِ کہ کانفرنس اٹ نی دیر آ معاہدہ نا منظوری و داڑآ عملدرآمد کن روڈ میپ اس ایتسہ۔
