اسلام آباد۔ 13ا پریل (اے پی پی ) اسلام آباد ہائی کورٹ مسکوہی وزیراعظم نا سلاہکار احتساب شہزاد اکبر و شہباز گل نا پن ءِ اسٹاپ لسٹ اٹ پن ءِ شاغنگ نا برخلاف دائر درخواست آ پن ءِ کشنگ نا پرمان کرسا سیکرٹری داخلہ غان 18 اپریل اسکان رپورٹ ءِ بٹنگا۔ چارشنبے نادے آ عدالت عالیہ نا چیف جسٹس اطہر من اللہ سماعت کرے۔ سماعت اٹی مرزا شہزاد اکبر و شہباز گل عدالت اٹی پیش مسر وخت اس کہ ایف آئی اے نا کنڈآن مجاز آفیسر عدالت اٹ پیش مس۔ سماعت اٹی ڈائریکٹر لاء ایف آئی اے عدالت ءِ پارے کہ ڈائریکٹر ایف آئی اے نا لیٹر ملاسس کہ ملک اٹی غیر معمولی صورت حال ئسک ، ہراڑآ چیف جسٹس اَریفے کہ انت مارشل لالگاسس؟۔ ڈائریکٹر لاء پارے کہ ایف آئی اے زون اسلام آباد آن درخواست دوئی مسوسس، اِرا انکوائری رجسٹر کننگانے۔ چیف جسٹس اطہر من اللہ پارے کہ دا سنجیدہ باندات اسے، ایف آئی اے داکورٹ ءِ ریگولر اٹینڈ کرسا کرینے، انت دا سہ پوسکن ءُ ایف آئی اے اس بسنے؟۔ درخواست تروک آ تا وکیل پارے کہ عدالت نا پرمان آ عمل متنے، داسکان پن اسٹاپ لسٹ اٹی اوار ءِ۔ چیف جسٹس پارے کہ ایف آئی اے نا کڑد انا 2 سال آن جاچ ءِ ہلنگ اُن، اسٹاپ لسٹ اٹ پن ءِ شاغنگ کن ہراکانود ءِ۔ چیف جسٹس اطہر امن اللہ ریمارکس تس کہ دا وڑوڈول بھاز متکن مسنے، شہزاد اکبر و شہباز گل نا پن ءِ اسٹاپ لسٹ آن دمدستی وڑاٹ کشنگے۔ مسکوہی سلاہکار احتساب پارے کہ اوڑآن اَریفر کہ نن تینٹ اڈیالہ غا کانہ، ہراڑآ چیف جسٹس اطہر من اللہ اَریفے کہ نم زندان آ ہِننگ خوارے ؟ داڑآ شہبازگل نا وکیل پارے کہ کنا موکل نا حداسکان داوڑنا ہچ ءُ بیان اس بتنے۔ ایف آئی اے کمامدار آک پاریر کہ عداالت نا پرمان ہرے آ ملا، آفسیر آک ترابیح خواننگ کن ہناسر، داسہ عدالت نا پرمان آ عمل مریک۔ اسلام آباد ہائی کورٹ ڈی جی ایف آئی اے ءِ پارت کرے کہ کس اسے زیزاریفنگپ، ڈی جی ایف آئی اے و سیکرٹری داخلہ 18 اپریل اسکان رپورٹ ءِ عدالت اٹ جمع کرفر۔
