اسلام آباد۔ 12 اپریل (اے پی پی) وزیراعظم شہباز شریف سے شنبے نادے آ سیوتی جماعت آتا سرکڑدہ غاتون جتا جتا اوڑدہی کرینے۔ وزیراعظم آفس نا میڈیا ونگ انا کنڈآن سے شنبے نادے آ جاری بیان نا رداٹ وزیراعظم میاں محمد شہباز شریف پی پی پی نا چیئرمین بلاول بھٹو زرداری و ایم کیو ایم نا ڈاکٹر خالد مقبول صدیقی تون اوڑدہی کرے۔ وزیراعظم شہباز شریف مولانا فضل الرحمان نا ہنکین آ ہم ہنا و اوڑتون اوڑدہی کرے۔ وزیراعظم شہباز شریف سردار اختر مینگل، ڈاکٹر خالد مگسی، شاہ زین بگٹی واسلم بھوتانی اس تتون ہم اوڑدہی کرے۔ شہباز شریف وزیراعظم نا منصب آ تینا پنداری، مخ تفی ٹی وونٹ تننگ و کمکاری آ اسٹ اسٹ غٹ سرکڑدہ، راہشون و قومی اسمبلی نا باسک آتا منت واری ءِ ہرفے۔ وزیراعظم شہباز شریف سیوتی جماعت آتا سرکڑدہ غاتون کابینہ نا ٹہیفنگ آ اہم سلابت ہم کرے۔ اوپارے کہ نن ہندا جوزہ و تین پہ تینی پت اتون مون آ کانہ ہرانا کمک اٹ دا مزل اسکان سرمسونن۔ اوسیوتی جماعت آتا سرکڑدہ غاتے باور کرفے کہ سیوت، سلابت و کمکاری اتون مون آ کانہ و اواری اٹ ویل آتے ایسر و قول آتے پورو کینہ۔
