اسلام آباد۔ 12 اپریل (اے پی پی) وزیراعظم شہباز شریف سے شنبے نادے آ وزیراعظم آفس آ سرمرسا زمواری تا باضابطہ سرتننگ نا بناءِ کرے۔ وزیراعظم شہباز شریف تخوک آ دفتری وخت و پاس بنا کننگ آن مست ہی سہب انا 8 بجہ غا دفترآ سرمس وخت اس کہ روچہ مبارک اٹی سرکاری وخت و پاس نا رداٹ دفترآک سہب انا 10 بجہ غا ملنگرہ۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف ہفتہ ٹی اِرا دے انا جاگہ غا اسہ دے انا چٹھی نا پارت کرینے وخت اس کہ سرکاری دفترآتا وخت و پاس اٹی بدلی کرسا دفترآتے سہب انا 10 بجہ نا جاگہ غا 8 بجہ غا ملنگ نا پارت کرینے۔ داکان بیدس وزیراعظم شہباز شریف نا آفس ءِ سنبھالنگ تون الس ءِ ریلیف نا فراوانی نا اونا پڑوآتیا عملدرآمد بناکرینے۔ وزیراعظم شہبازشریف تدوک آ دے قومی اسمبلی ٹی کروک آ تینا پڑو آتیا عملدرآمد نا پرمان جاری کرے۔ اوپارت کرے کہ روچہ مبارک اٹی اڑزآن بازار تیٹی آب اٹ و اڑزآن نرخ آتیا گڑاتا فراوانی ءِ پک کننگے۔ اوروچہ بازار تا سخت مانیٹرنگ ءِ پک کننگ نا ہم پارت کرے۔ وزیراعظم خبڑدار کرے کہ الس ءِ اڑزآن گڑاتا فراوانی ٹی ڈیوالئی ءِ سگنگ پننگک۔ اوپنشنرآتا پنشن اٹی ودکی، کم از کم اجرت 25 ہزار کننگ نا پڑو آتیا دمدستی عملدرآمد نا پرمان ہم جاری کرے۔ وزیراعظم شہباز شریف تون وزیراعظم آفس نا آفیسر و عملہ اوڑدہی کرے۔ وزیراعظم اوفتے پارت کرے کہ او مخ تے تفر، نن الس نا خذمت کن بسونن۔ اوپارے کہ ایمانداری ، شفافیت، مستعدی ، خواری ننا راہشون اصول ءِ۔
