لاہور۔ 11 اپریل (اے پی پی ) لاہور نا احتساب عدالت مسلم لیگ ن نا راہشون خواجہ سعد رفیق و خواجہ سلمان رفیق نا برخلاف پیراگون ہاؤسنگ سوسائٹی ریفرنس اٹ نیب استغاثہ نا پین مسہ گواہ تا بیان تے ریکارڈ کننگ آن پد سماعت ءِ 27 اپریل اسکان پد بٹے، عدالت بروک آ سماعت آ دوبہ دار آتون اوار گواہ تے شرہ کن بٹنگا۔ احتساب عدالت نا جج نسیم احمد ورک دوشنبے نادے آ پیراگون ہاؤسنگ سوسائٹی ریفرنس آ سماعت کرے، سماعت آ خواجہ سعد رفیق نا کنڈآن حاضری معافی نا درخواست جمع کرفنگا ہراٹی عدالت آن خواست کننگاکہ خواجہ سعد رفیق اسلام آباد اٹی اسمبلی دیوان اٹی اختہ ءِ اسہ دے انا حاضری معافی نا درخواست ءِ منظور کننگے۔ عدالت حاضری معافی نا درخواست ءِ منظور کرے وخت اس کہ خواجہ سلمان رفیق عدالت اٹ پیش مس و تینا حاضری ءِ خلفے۔ سماعت اٹی گواہ سلیم اختر، محمد یونس و محمد اعجاز بیان قلمبند کرفیر اوکان پد عدالت مستی سماعت ءِ 27 اپریل اسکان پدبٹسا بروک آ سماعت آ دوبہ دار آتون اوار گواہ تے شرہ کن بٹنگا۔ احتساب عدالت نا روپرو پیراگون ہاؤسنگ سوسائٹی ریفرنس کیس اٹی داتم اسکان 32 گواہ تینا بیان تے قلمبند کرفینو خواجہ برادران نا برخلاف جم وڑاٹ 130 گواہ بیان قلمبند کرفرہ۔
