اسلام آباد۔ 19 دسمبر (اے پی پی) سیکرٹری جنرل اسلامی کمکار تنظیم حسین ابراہیم طحہٰ پارینے کہ کنا کماشی ٹی اسلامی کمکار تنظیم (او آئی سی) نا جنرل سیکرٹریٹ تدوک آ کیہی سال و تُوآن اوغانستان اٹی برجا بھلا انسانی حالیت آتیا بھاز گڑتی اتون سخت نظر تخانے، اوغانستان اٹی مروک آ ساڑی آ بدلی اوغان الس نا تکلیف و بنداوی گرج آتے پین پیچیدہ کرینے، دا تکلیف آتا غٹ آن زیات زالبول و چناتے مون تروئی تمنگ ءِ ہرا دا تنکی ٹی غٹ آن زیات نزور جوڑ مسنو۔ پاکستان نا مہمانداری ٹی او آئی سی وزراء خارجہ کونسل نا 17 می اہم انگا دیوان نا وخت آ تینا خصوصی کلہو اٹی سیکرٹری جنرل او آئی سی پارے کہ داوخت آ اسلامی سروکی دیوان نا سروک نا حیثیت اٹ سعودی عرب نا است انا حب اٹ منت وار اُن کہ او اوغانستان ناانسانی گرج آتا بگڑینگوک آ حالیت آتیا وزراء خارجہ نا کونسل نا بھاز اہم انگا دیوان ءِ بٹنگ انگ نا اہم ءُ گام اس ہرفے۔ داکان بیدس ای اسلامی جمہوریہ پاکستان نا حکومت نا کنڈآن کانفرنس نا است انا بھلنی اٹ مہمانداری ءِ امنا کننگ نا ستاءِ کیوہ۔ اوپارے کہ اوغان جھیڑہ نا وخت آ ہم او آئی سی مدام اوغانستان اٹی اوغان الس نا است خواہی تیا مبنی امن عمل نا پورو مخ تفی ءِ کرے، داہیت انا درشانی 11 جولائی 2018ء آ سعودی عرب نا شار مکہ مکرمہ ٹی امن و سوگوی نا بابت مروک آ جہانی کانفرنس آن پد جاری کروک اعلامیہ غان بیدس اسلامی سروکی دیوان و وزراء خارجہ نا کونسل نا دیوان تیٹی اوغانستان نا حالیت آتیا منظور کروک آ فیصلہ و قرارداد آتیٹی پیدوار وڑاٹ کننگانے۔ سیکرٹری جنرل او آئی سی پارے کہ او آئی سی نا اہم باسک مننگ نا ناطہ اوغانستان ءِ تنظیم نا باسک ملک آتا کنڈآن پورو مخ تفی و یکجہتی نا گرج ءِ، داوخت آ اوغان الس ءِ جان جوڑی، خورانا رکھ و سفائی کون آ بشخ آتیٹی بھلو کچ اسے آ امداد سرکننگ نا دمدستی و سخت گرج ءِ۔ او اسلامی شونداری بینک و اسلامی یکجہتی فنڈ انا کمک اٹ او آئی سی نا غٹ باسک ملک آتیا زور شاغا کہ او اوغانستان کن کمکی ڈٹ ءِ منظم و اوڑآ دمدستی عملدرآمد کن المی مالی وسیلہ غاتا فراوانی اتون اوار اوار فعال کڑد ہم ادا کیر۔ اوپارے کہ پکا یخین ءِ کہ او آئی سی نا باسک ملک آک، اقوام متحدہ و علاقائی شریدار آتیان بیدس تعلقدار فریق آک اوغانستان اٹی تباہ کن انسانی حق انا حالیت آتا پائیدار ایسر اس کشنگ کن ہرممکن گام گیج کیرہ۔
