کابل۔ 12 اکتوبر (اے پی پی) اوغانستان اٹی پاکستان نا سفیر منصور احمد خان پارینے کہ اوغانستان آ طالبان تا حکومت آن پد امن و ایمنی نا حالیت آتے ٹی نسبتا گچینی بسنے، امن و سوگوی و سلامتی اولیت آک ءُ و طالبان تا کماشی ٹی دابابت حالیت آک گچین مسنو ۔ جہانی برادری طالبان حکومت تون گپ وتران ءِ برجاتخے، امریکی میگزین’’فارن پالیسی‘‘ ءِ اسہ انٹرویو اسے ٹی اوپارے کہ پاکستان اوغانستان اٹی انسانی حق ، زالبول آتا حق و حکومت اٹ غٹ مذہبی و لسانی پڑک آتا اوارمننگ نا مخ تفی ءِ کیک۔ اوپارے کہ اوغانستان نا الس نا اکثریت طالبان تا حکومت نا مخ تفی ءِ کیک، پاکستان و اوغانستان نا نیام اٹ واپاری سرجزآک برجاءُ ہرافتے ٹی پدریسہ ودکی مننگ ءِ۔ سفیر منصور احمد خان اسہ سوج اسے نا ورندی ٹی پارے کہ 15 اگست آ اوغانستان آ طالبان نا حکومت آن پد امن و ایمنی نا حالیت آتے ٹی بھلو گچینی اس بسنے، داعش نا گڑاس جلہو آتیان بیدس سلامتی نا بابت ہچ ءُ بھلو واقعہ اس پیش بتنے جم وڑاٹ اوغانستان اٹی امن وایمنی نا حالیت گچین ءِ۔ اسہ پین سوج اسے ناورندی ٹی اوپارے کہ اوغانستان نا بابت پاکستان نا ہچ ءُ پسندیدہ اس اف چائے اوڑے ہرکس نا کہ حکومت مرے، نن مدام داہیت آ زور شاغانن کہ اوغانستان نا حکومت سوگو ءُ حکومت اس مرے و ہندن ءُ حکومت اس مرے ہرا اوغان الس نا است خواہی تارداٹ مرے ہرانا اوغان گل زمین آ پورو کنٹرول مرے تانکہ دہشت گرد یا عسکریت پسند پڑک اس تینا ٹھکانہ یا پناہ گاہ جوڑ کننگ کپ۔ اوپارے کہ اوغانستان اٹی حکومت نا بدلی آن پد امنائی سیاسی انتظام مفننگ نا سوب اسہ وڑانا خلااس ئس، امریکہ اوغانستان نا زرمبادلہ نا کوڑی تے ہم منجمد کرے ہرانا سوب اوغانستانءِ بنداوی گرج آتے پورو کننگ اٹ مشکل مون تروک ءِ وخت اس کہ اوغانستان نا زرگزران و بینکاری لین دین آ دباؤ ءِ داسوب آن گڑاتا فراوانی ٹی کاختی نا مون تروک ءِ، سیڷ انا بننگ بننگ اسے داحالیت شدت اختیار کننگ کیک۔
