اسلام آباد۔ 15ستمبر (اے پی پی) وزیراعظم عمران خان تاجکستان نا صدر امام علی رحمانوف نا سلہ غا 16آن 17ستمبر تاجکستان نا اِرادے ئی سرکاری دورہ ءِ کیک، اسہ بڑزکو کہولی وزارتی ڈل اس ہم وزیراعظم تون اوار مریک۔ وزیراعظم نا نیامی ایشیانا دا مسٹ میکو دورہ مریک ہراڑآن ڈیہہ نا ملک آتون پاکستان نا ودوک آ تعلقداری نا عکاسی مریک۔ وزیراعظم عمران خان دوشنبے ٹی شنگھائی کمکار تنظیم(ایس سی او) نا 20می سربراہی دیوان اٹی بشخ ہلیک۔ داکان مست او 13و 14جون 2019آ کرغز جمہوریہ نا دارالحکومت بشکیک اٹی اڈ ہلوک ایس سی او نا سربراہی دیوان و 10نومبر 2020آ ویڈیو کانفرنس نا کمک اٹ روس انامہمانداری ٹی سربراہی دیوان اٹی بشخ ہلکوسس۔ شنگھائی کمکار تنظیم اسہ 8باسکی آخبتی بین الحکومتی علاقائی تنظیم اسے ہرادے 15جون 2001آ شنگھائی ٹی جوڑ کننگاسس۔ پاکستان 2005اٹی ایس سی او نا مبصر و جون 2017ٹی آستانہ سروک دیوان اٹی تنظیم نا پورو باسک جوڑ مس۔ روس، چین، بھارت، ازبکستان، قازقستان، کرغز جمہوریہ و تاجکستان ایس سی او نا ایلو باسک ملک آک ءُ۔ شنگھائی کمکار تنظیم اٹی ایران، منگولیا، بیلاروس و اوغانستان مبصر وخت اس کہ آذربائیجان، آرمینیا، کمبوڈیا، نیپال، ترکی و سری لنکا ڈائیلاگ پارٹنرز نا حیثیت اٹ اوار ءُ۔ وزیراعظم شنگھائی کمکار تنظیم نا دیوان نا وخت آ ایلو شریک راہشون آتون ہڑتوم آ کنڈآتیا اوڑدہی یم کیک۔ ایس سی او سروک دیوان اٹی بشخ ہلنگ آن پد وزیراعظم تاجک صدر تون اوڑدہی کیک، ہڑتوم آ راہشون تا گپ وتران ہڑتوم آ کنڈآتا تعلقداری نا غٹ پلو آتا احاطہ ءِ کیک ہراٹی علاقائی رابطہ غا خصوصی چکار اتون واپاری، اقتصادی و زرکاری نا تعلقداری تے ودفنگ خاص وڑٹ اوار ءِ۔ ہڑتوم آ ملک آک داکان مست باضابطہ اسٹریٹجک شریداری ٹی داخل مننگ نا سوگو عزم انا درشانی ءِ کرینو۔ وزیراعظم عمران خان پاکستان تاجکستان بزنس فورس نا اولیکو دیوان نا بناءِ ہم کیک ہراڑکن پاکستانی پوریاگرآتا اسہ پڑک اس دوشنبے نا دورہ ءِ کیک۔ جوائنٹ بزنس فورم ودوک آ واپاری و زرکاری نا تعلقداری تے متحرک کیک و ہڑتوم آ کنڈآتا پوریاگربرادری نانیام اٹ کاروباری رابطہ غاتے مون آ دیک۔ داوخت آ پاکستان تاجکستان اسیجائی بزنس کونسل نا دیوان ہم مریک۔ پاکستان و تاجکستان نا نیام اٹ اسیجائی عقیدہ، تاریخ و دودوربیدگ نارشتہ غاتیا مبنی خڑکی برادرانہ تعلقداری ءِ۔ ہڑتوم آملک آک ڈیہہ ٹی زرگزرانی شونداری، امن و سلامتی و سوگوی ءِ مون آ دننگ کن اسیجائی خیال و اسہ وڑ خواہش تخرہ۔ وزیراعظم عمران خان نا دا دورہ نیامی ایشیاتون ”ویژن سینٹرل ایشیا“ پالیسی نا رداٹ پاکستان نا گہری تعلقداری تا بشخ اسے ہراٹی سیاسی تعلقداری، واپار و زرکاری، توانائی و رابطہ غاتیان بیدس سیکورٹی ودفاع ناپنچ اہم بشخ آتیا چکار کننگانے۔
