
واشنگٹن۔ 14ستمبر(اے پی پی) امریکہ ٹی پاکستان نا سفیر اسدمجید خان پارینے کہ اسہ ملک اس ہم داتم اسکان طالبان تے باقاعدہ وڑاٹ امنا کتنے، جہانی برادری نا گڑتی تے مر کننگ و کروک آ قول آتا پوروی کن اوغانستان نا پوسکن آ حکومت نا لائخی تا جاچ ءِ ہلنگ اُن، بھارت اٹ بنیاد پرست حکومت ننا امن گام گیج آتے رد کرے، ہڑتوم آ ملک آتون امن آن بیدس ہچ ءُ آپشن اس اف۔ اوداہیت ءِ امریکہ نا موقر میڈیا ادارہ ”دی واشنگٹن ڈپلومیٹ“ ءِ انٹرویوٹی پارے۔ اوغانستان نا حالیت آتا بابت پاکستانی سفیر پارے کہ داوخت ءِ مستین آ سبخ اس ہیل کننگے، ننا چرجوئی اتون دا موقف مسنے کہ اوغان جھیڑہ نا ہچ ءُ فوجی ایسری اس اف بلکن دارداٹ سیاسی گپ وتران درکارءِ، نن داہم پیدوار کرین کہ امریکی فوج انا زموارانہ پیش تمنگ آن امن عمل اٹ پیش رفت مریک، ہنداسوب آن پاکستان بین الاوغان مذاکرات نا مخ تفی ءِ کرے و دابابت اہم پیش رفت ہم مس۔ اوپارے کہ اوغانستان اٹی سیکورٹی حالیت آک کنٹرول اٹی ءُ، طالبانک معافی نا پڑو ءِ کرینو و اسہ وڑنا ہم انتقامی کارروائی تیٹی اوار متنو۔ پاکستانی سفیر پارے کہ گڑتی تیان چپ پین اوغان مہاجر پاکستان آ بتنو۔ اِراعشرہ مست امریکہ غا بدترین دہشت گرد جلہو آتا بابت سوج آ اوپارے کہ ننا ہمدردی پدسلوک آخاہوت آتون ءِ۔ اوپارے کہ دہشت گردی نا برخلاف جنگ اٹ پاکستان نا ہم بھلو نسخان اس مس، داجنگ اٹ ننا 80ہزار آن زیات جان ہنار وخت اس کہ زرگزران ءِ 150ارب ڈالر آن زیات نا نسخان مس۔ اوپارے کہ نن تینٹ دہشت گردی نا شست مسن، ہنداخاطرآن زہمی تا دڑد ءِ پہہ مرینہ، ننے امریکی الس نا مشکل آتا سماءِ۔ داہیت ءِ پک کننگ کن ننا الس ءِ دُوارہ داوڑنا دے خنوئی تمپ، نن تینا شریدار آتون اواری اٹ کاریم کننگ کن سنبرینگوک اُن۔ پاک امریکہ تعلقداری تا بابت سوج آ سفیر پارے کہ امریکہ تون پاکستان نا تعلقداری مدام بھاز اہم مسنے۔ نائن الیون آن پد آن نن اوغانستان ءِ مون آتخسا اوار مسنو، اوپارے کہ اوغانستان اٹ تینا فائدہ و اومیت آتا بابت نن اسیجائی موقف تخنہ و خوانہ کہ اوغانستان اٹی تدوک آ منہ عشرہ غاتیان دوئی مروک آ فائدہ غاتا رکھ ءِ کننگے۔ اوپارے کہ اوغانستان اٹی طالبان تا حکومت تون اسہ پوسکن ءُ حقیقت اس مون آ بسنے۔ جہانی برادری ءِ دا فیصلہ کروئی ءِ کہ طالبان آتون رابطہ ٹی رہینگے یا آخا ولے دانا مطلب اوفتے لازماََ امناکننگ اف۔ اوپارے کہ نن طالبان تا حکومت ءِ امنا کتون و پین ملک اس ہم داتم اسکان طالبان تے باقاعدہ وڑاٹ امنا کتنے، نن طالبان تا کنڈآن جہانی برادری نا گڑتی ءِ مر کننگ و اوفتا قول آتا پوروی کن اوغانستان نا پوسکن آ حکومت نا لائخی نا جاچ ءِ ہلنگ اُن۔