اقوام متحدہ۔ 22 جنوری (اے پی پی) اقوام متحدہ نا جنرل اسمبلی مذہبی ہند آتا رکھ انا بابت پاکستان، سعودی عرب و ایلو مسلم ملک آتا پیش کروک پوسکن آ قرارداد نا امنائی سلاہ اٹ منظوری ءِ تس ہراٹی مذہبی ہند آتا برخلاف جلہو آتا مذمت ءِ کننگا و ہر کہول آ امن و سگ انا کلچر ءِ مون آ دننگ کن پبی کوشست آتا خواست ءِ کننگانے۔ اقوام متحدہ ٹی پاکستان نا آخبتی مندوب منیر اکرم جنرل اسمبلی ٹی مذہبی ہند آتا رکھ انا بابت قرارداد نا منظوری آ تیناتران اٹی پارے کہ دا قرارداد نا منظوری پاکستان نا وزیراعظم عمران خان نا اسلامو فوبیا نا چٹفنگ و گڑاس ملک آتیٹی مسلمان تا مذہبی مزار، مسیت، علامات و مقدس شخصیت آتیا جلہو آتے کالعدم گوندنگ کن کروک آ کوشست آتا بشخ اسے۔ اوجنرل اسمبلی ٹی امنائی سلاہ اٹ منظور کروک قرارداد نا منظوری آ پورو پت انا درشانی ءِ کرسا اسمبلی نا ہر وڑنا بیدادی، تباہی و مچ آ دنیا و خاص وڑاٹ بھارت اٹی مذہبی ہند آتے براہ راست نسخان تننگ و اوفتیا جلہو آتا مذمت نا خصوصی حوالہ تس۔ قرارداد نا شڑت آتا رداٹ سیکرٹری جنرل ءِ مذہبی ہند آتا رکھ انا پلان آف ایکشن ءِ مون آ دننگ کن جہانی کانفرنس بٹنگ نا سلہ خلنگا ہراٹی حکومت، سیاسی شخصیت، مذہبی راہشون، سول سوسائٹی و میڈیا ءِ ہم اوار کننگانے۔ قرارداد اٹی مذہبی ہند آتے چٹفنگ یا مذہبی ہند آتا زوراکی اٹ گدریفنگ یا بدلی نا ہر وڑنا گام ومذہب یا عقیدہ نا بنداو آ مخلوق نا برخلاف تشدد نا ترندی اٹ مذمت ءِ کننگا۔ جنرل اسمبلی ودوک آ مذہبی بے سگی، نسلی پرستی و دقیانوسی تصور آتیا گڑتی نا درشانی ءِ کرسا قومی، نسلی یامذہبی خار انا ہروڑنا مخ تفی نا مذمت ءِ کرے ہرا امتیازی سلوک، دشمنی یا تشدد کن ہشکا تننگ نا سوب مریر و ریاست آتیان داوڑنا واقعہ غاتون مون تننگ کن گچین گام گیج کننگ نا خواست کرے۔ قرارداد اٹی زور شاغنگاکہ تین پہ تینی انحصار، تین پہ تینی وابستگی و تین پہ تینی سوگوی کن مذہب یا عقیدہ نا آجوئی، رائے عامہ و آجوئی سلاہ درشانی پرامن اجتماع نا حق و وابستگی نا آجوئی نا حق دوئی مرے۔
