نئی دہلی۔ 30 نومبر (اے پی پی) اسلامی کمکار تنظیم(او آئی سی) نا کنڈآن کشمیر نا بابت قرارداد منظور کننگ آن بھارت ہبکہ مس و پاہک کہ اوآئی سی پاکستان نا پاننگ آ کشمیرنا حق اٹی اعلامیہ جاری کرینے۔ کشمیر میڈیا سروس نا رداٹ بھارتی وزارت خارجہ نئی دہلی ٹی داپارسا تینا شرمندگی ءِ مُر کننگ نا کوشست کرینے کہ نن نیامی ٹی اسلامی کمکار تنظیم نا وزرائے خارجہ کونسل نا 47 می دیوان اٹی منظور کروک آ قرارداد آتیٹی بھارت نا بارواٹی غلط راستکی، بے بنداو و بے گرج حوالہ جات تننگ ءِ سختی اٹ مسترد کینہ۔ امور کشمیر نا چاہندار آتا پاننگ ءِ کہ بھارتی وزارت خارجہ نا بیان آن کشمیر نا بارواٹی او آئی سی نا سخت اعلامیہ غا مودی حکومت نا ہبکہ ئی و مایوسی نا درشانی مریک۔ بھارتی وزارت خارجہ مستی پارے کہ ننا مدام دا موقف مسنے کہ جموں و کشمیر تون اوار او آئی سی ءِ بھارت نا تہہ نا باندات آتیٹی دخل تننگ نا ہچ ءُ حق اس اف۔ او آئی سی نا اعلامیہ غان بھارت مسلم فورم ءِ دا مشورہ تننگ آ بیوس مس کہ او آخبت اٹ داوڑنا حوالہ جات تننگ آن پاناد کیر۔ بھارتی بیان اٹی پاننگاکہ داہیت افسوزناک ءِ کہ مسلم ادارہ اسہ خاص ءُ ملک اسے نا کمک اٹ استعمال مننگ ءِ(داڑے پیدوار اشارہ پاکستان نا کنڈآٹے)۔ نائیجر نا شار نیامی ٹی 27 آن 29 نومبر اسکان مروک آ او آئی سی نا وزرائے خارجہ کونسل نا 47 می دیوان اٹی غیر کانودی وڑاٹ بھارت نا کوزہ ٹی جموں و کشمیر نا جہانی کہول آ امنا کروک متنازعہ حیثیت ءِ بدل کننگ کن بھارت نا کنڈآن 5 اگست 2019آن پد کروک آ غیر کانودی و اسہ کنڈی گام گیج ءِ ہروڑاٹ مسترد کننگانے و بھارت آن خواست کننگانے کہ او تینا غیر کانودی گام گیج آتے پدی ہلے۔
