نیویارک۔ 16 اکتوبر (اے پی پی) پاکستان پارینے کہ سلامتی کونسل نا قرارداد آک کشمیری تے تینا آخبت نا فیصلہ ءِ تینٹ کننگ نا حق ایتک ہنداخاطرآن کشمیر نا جھیڑہ ءِ ایسر کننگ آن بیدس اقوام متحدہ نا نوآبادیات نا چٹفنگ نا ایجنڈا بے پورو سلک۔ اقوام متحدہ ٹی پاکستان نا نائب آخبتی نمائندہ محمد عامر خان جنرل اسمبلی نا خصوصی پولیٹیکلک اینڈ ڈیکلونائزیشن (فورتھ) کمیٹی نا دیوان آن تران کرسا پارے کہ بھارت کوزہ و بیدادی نا کسر ءِ ہلسا ہفت دہائی آن جموں و کشمیر نا مخلوق نا حق خودارادیت آن انکار کرینے۔ اومستی پارے کہ جموں و کشمیر نا جھیڑہ نا ساف ایسری آن بیدس اقوام متحدہ نا نوآبادیات نا چٹفنگ نا فیصلہ کن ایجنڈا بے پورو سلک۔ اوپارے کہ حق خودارادیت نا نفی مدام اشتعال، بے است جمی، جھیڑہ غاتیٹی شدت ودی کیک و امن و سلامتی کن خطرہ پک مریک۔ اوپارے کہ است ہسونی نا ہیت اسے کہ سویلی ایشیاء و دے ٹکی نیامی نا ڈیہہ کیہی دہائی آن داحالیت آتیان گدرینگ انگ ءِ و جہانی برادری نا کنڈآن کشمیری و فلسطینی تا حق خودارادیت نا پدریسہ مخ تفی آن پد ہم اوفتے دا حق آن عملا محروم تخنگانے۔ اوپارے کہ استعماری تسلط نا دامشق و پیشن نا کوزہ غاتیا اصرار انسان تا سیاسی و زرگزرانی آجوئی نا جہانی اصول ءِ مجروح کننگ ءِ۔ او5 اگست 2019ء آ بھارت نا کنڈآن مقبوضہ کمشیر نا خصوصی حیثیت نا چٹفنگ، گھیڑ و اونا آبادیاتی تشکیل اٹ بدلی نا حوالہ ءِ ترسا پارے کہ دا گام گیج آتا کمک اٹ اقوام متحدہ نا چارٹر، سلامتی کونسل نا تعلقدار قرارداد و جنیوا کنونشن تون اوار جہانی کانود نا پاش آن پاش خلاف ورزی کننگا۔ اوپارے کہ تدوک آ 14 تُو اٹی بھارتی حکومت مقبوضہ کشمیر نا غٹ سیاسی راہشون تے بند و 13 ہزار کشمیری ورناتے غیر کانودی دزگیر کرے، چنک سن مارتے مقدمہ چلیفنگ آن بیدس پاہو تننگا وخت اس کہ برانز کروک آتے بیدادی نا شست کننگا، محلہ و خلق آتے دڑفنگا و خاخرترسا کننگانے۔ پاکستانی مندوب پارے کہ کشمیر اٹی انسانی حق انا بھلا خلاف ورزی تیا جہانی برادری بھارت ورندی بٹنگے و سلامتی کونسل نا قرارداد آتا رداٹ کشمیری الس ءِ اوفتا حق خودارادیت نا فراوانی ءِ پک کننگے۔ اواقوام متحدہ غا زور شاغا کہ او بھارت وپاکستان اٹ تینا فوجی مبصر پڑک ءِ فعال کے تانکہ او جنگ بندی نا خلاف ورزی تے تورفنگ کن تینا گچین کڑد ءِ ادا کننگ نا قابل مننگ کے۔ اوپیدواری کرے کہ اقوام متحدہ نا سیکرٹری جنرل و سلامتی کونسل ناکنڈآن جنگ بندی نا خواست آن پد ہم بھارت کشمیر نا جھیڑہ ئی علاقہ ٹی لین آف کنٹرول (ایل او سی) آ جنگ بندی نا خلاف ورزی تے ترند کرینے۔ اوزورشاغسا پارے کہ بھارت نا کنڈآن سیز فائر نا خلاف ورزی و پاکستان آ جارحیت نا خطرہ غاتا سوب اقوام متحدہ نا فوجی مبصر مشن نا کڑد و اہمیت دے پہ دے اہم مرسا کننگ ءِ۔ اوپارے کہ نن کسبی چاہنداری تکوک اسہ گمر نا قابل بھلو فوج اس تخوک ملک اسے نا حیثیت اٹ امن کن تینا کڑد ءِ ادا کننگ کن تیار اُن و گچین بھرم تیکن ہیت و گپ انا خیرمقدم ءِ کینہ۔ اوپارے کہ نن امن نا بھرم تیٹی گچینی اتنگ کن اسیجائی مسخت آتا دوئی کننگ کن غٹ اسٹیک ہولڈر آتون اواری اٹ کاریم کننگ نا چاری اُن۔
