اسلام آباد۔ 11مئی (اے پی پی) وزیراعظم محمد نواز شریف چارشنبے نا سہب تاجکستان نا اِرا دے ئی سرکاری دورہ غا رادہ مس۔ ہراڑے او بجلی نا ڈٹ ”کاسا 1000“ نا بناءنا دود اٹی شرکت کیک۔ وزیراعظم پاکستان دا دورہ ئِ تاجکستان نا صدر امام علی رحمانوف نا سلہ غا کننگ ئِ۔ بنجائی وزیر دیر و بجلی و دفاع خواجہ محمد آصف، وزیراعظم نا خصوصی کمکار خارجہ امور طارق فاطمی و سینئر کمامدار آک ہم وزیراعظم تون اوارو ۔ شریک ملک و ایلو کڑدہ غاتا راہشون آتا ہم ”کاسا1000“ نا بنانا دود اٹی شرکت نا اومیت ارے۔ ”کاسا1000“ ڈٹ انا رداٹ تاجکستان و کرغزستان تیرمہ نا وخت آ اسہ ہزار میگاواٹ بجلی پاکستان ئِ و 300میگاواٹ بجلی اوغانستان ئِ مہیا کیک۔ دا ڈٹ 2018ءاسکان پور ومننگ نا اومیت ارے۔ ڈٹ انار داٹ ہلوک آ بجلی آن تیرمہ ٹی پاکستان ئِ بجلی نا کمتی ئِ مر کننگ اٹی کمک رسینگک۔ داوخت اٹی تاجکستان اٹی فاضل پن بجلی دوئی مریک و داوڑ دا ڈٹ غٹ اکن فائدہ مند ثابت مریک۔”کاسا1000“ ڈٹ تینا وڑ انا اولیکو ڈٹ ئِ ہرا پاکستان ، اوغانستان ، تاجکستان و کرغزستان ئِ بجلی نا گریڈ تون منسلک کیک۔ دا ڈٹ علاقائی ہم آہنگی ٹی ہم کمکار مریک ہرا ڈیہہ نا اقتصادی و راجی شون اکن بھاز اہمیت تخک۔ وزیراعظم محمد نواز شریف دورہ نا وخت آ تاجکستان نا صدر تون ہم اوڑدہی کیک ہراٹی واپار، توانائی، دفاعی کمک تون اوار گیشتر ہڑتوم آ کنڈآتیا ہیت و گپ مریک۔ ہڑتوم آ راہشونک تین پہ تینی است خواہی نا علاقائی و جہانی معاملہ غاتیا ہم درشانِ خیال کیرہ۔
