دبئی۔ 11 فروری (اے پی پی) بنجائی وزیر اطلاعات و نشریات چوہدری فواد حسین پارینے کہ وزیراعظم عمران خان نا ویژن، پالیسی و اصلاحات نا ایجنڈا نا پین بھرمک بروک آ دے تیٹی پا ش مریرہ، درملکی زرکاری آن پاکستان اٹی روزگار نا وارخواہی تیٹی ودکی مریک۔ بنجائی وزیر اطلاعات و نشریات داہیت ءِ پیپسی کونا نائب صدر کرسٹا پائلٹ تون اوڑدہی ٹی گپ و تران کرسا پارے۔ اوڑدہی ٹی وزیر اطلاعات پیپسی کو ءِ پاکستان اٹی زرکاری نا سلہ خلک۔ داوخت آ کرسٹا پائلٹ پارے کہ پاکستان اٹی زرکاری نا خواہندار اُن، فوڈ (سنیکس) نا بشخ اٹی اسہ ارب ڈالر نا زرکاری نا ارادہ ارے، زرکاری نا رداٹ ملتان اٹی پوٹیٹو یونٹ اس جوڑ کینہ، خواہش ءِ کہ وزیراعظم عمران خان یونٹ نا بناءِ کے۔ بنجائی وزیر اطلاعات و نشریات چوہدری فواد حسین پیپسی کو نا کنڈآن پاکستان اٹی زرکاری نا خیرمقدم ءِ کرسا پارے کہ ملتان اٹی پوٹیٹو یونٹ نا جوڑ کننگ آن پٹاٹہ نا دسوک آ بزغر آک فائدہ ہرفرہ۔ اوپارے کہ برٹش ایئرویز، پیپسی کو و ایلو جہانی کمپنی تا پاکستان اٹی زرکاری دنیا نا پاکستان آ ودوک آ پت انا سفا ءُ شاہدی اسے۔ اوپارے کہ وزیراعظم عمران خان نا ویژن، پالیسی و اصلاحات نا ایجنڈا نا پین بھرمک بروک آ دے تیٹی ظاہر مریرہ۔ بنجائی وزیر چوہدری فواد حسین پارے کہ پاکستان نا متنوع دودوربیدگ، سازو زیمل و سیل و سوات ءِ مون آ دننگ اٹ پیپسی کو نا شریداری ءِ خوانہ، پاکستان زیب دار وادی و رنگ رنگی آ دودوربیدہ غاتا حسین ءُ مزل اسے، مچ آ دنیا ءِ پاکستان نا حقی دروشم ءِ نشان ایتنہ۔ اوپارے کہ درملکی زرکاری آن پاکستان اٹی روزگار نا وارخواہی تیٹی ودکی مریک۔
