اسلام آباد۔ 11 فروری (اے پی پی) بنجائی وزیر جان جوڑی عامر محمود کیانی پارینے کہ وزیراعظم نا وژن نا رداٹ پمز ہسپتال ءِ پوسکن آ آسراتی تیا ن آراستہ کننگ انگ ءِ ، اسلام آباد ءِ جان جوڑی نا بابت ماڈل سٹی اس جوڑ کننگک، اسلام آباد اٹی اولیکو نرسنگ یونیورسٹی اس جوڑ کننگ اُن۔ داہیت ءِ او دوشنبے نادے آ پمز اٹی ویسٹ تلف کروک آ مشین، مریض آتا خاہوت آتا زنانہ ومردانہ انتظار گاہ، کینسر نا مریض آتا کیموتھراپی وارڈ، کارڈیا لوجی فارمیسی و پوسکن بیرفوک سرجیکل وارڈ انا بناءِ کرسا پارے۔ وزیر جان جوڑی پارے کہ اسلام آباد نا غٹ ہسپتال آتون اوار پاکستان انسٹی ٹیوٹ آف میڈیکل سائنسز (پمز) انا مریض آتے گچین درمان و آب اٹ آسراتی تننگ پاکستان تحریک انصاف نا حکومت نا اولیت ءِ۔ بنجائی وزیر جان جوڑی پارے کہ پمز اٹی مریض آتے گچین آسراتی تننگ کن انفراسٹرکچر نا شونداری کن کوشست کننگ انگ ءِ ۔ عامر محمود کیانی پارے کہ حکومت جان جوڑی نا آسراتی تے ودفنگ و اوفتے ٹی گچینی اتنگ ءِ اولیت ایتک و پمز ہسپتال ءِ پوسکن آ مشینری و آسراتی تیان آراستہ کننگ انگءِ و مریض آتے کن پوسکن و آب اٹنگا آسراتی تا فراوانیءِ المی جوڑ کننگ اُن۔ کینسر نا مریض آتے کن پوسکن آ وارڈ انا بناءِ کننگ آن پد داسہ دامریض آتے کن کٹ آتا سد درسد فراوانی ءِ المی جوڑ کرینن وخت اس کہ یورالوجی و پلاسٹک سرجری کرفوک آتے کن ہم سرجیکل وارڈ آتے اول سرآن بیرفسا آسراتی تے گچین کرینن وزیر جان جوڑی پارے کہ کارڈیک سنٹر اٹی مریض آتا خیال ءِ کروک و خاہوت آتے کن ہم انتظارگاہ جوڑ کرینن ہراڑان مریض آتا خاہوت آک جوان وڑاٹ تینا مریض آتا خیال ءِ تخنگ کیر و است انا مرض اٹی مبتلا مریض آتے کن کارڈیک سینٹر اٹی فارمیسی اس ہم جوڑ کننگانے۔ بنجائی وزیر پارے کہ ننا حکومت نرس آتا استعداد سازی ءِ تینا وژن سرپند کیک و نرسنگ سیل اس ہم جوڑ کرینن، نرسنگ نا بشخ جان جوڑی ٹی تمبہ نا حیثیت تخک نرسنگ نا بشخ ءِ سوگو کننگ کن غٹ تر گام گیج کننگ انگ ءِ و 10 ارب روپئی نا خڑچ آن اسلام آباد اٹی نرسنگ یونیورسٹی اس جوڑ کننگ انگ ءِ ۔
