کیرج فیکٹری نا کچ ءِ ودفسا بروک آ سال آن غٹ مسافر ریل تے پاکستان اٹی جوڑ کینہ
ملازم آتے مسہ ہزار روپئی فی کس تننگ نا پڑو
اسلام آباد۔ 08 فروری (اے پی پی) بنجائی وزیر ریلوے شیخ رشید احمد پارینے کہ کیرج فیکٹری نا کاریم نا کچ ءِ ودفنہ، و بروک آ سال آن غٹ مسافر ریل تے پاکستان اٹی جوڑ کینہ، 11 فروری تھل ایکسپریس نا بناءِ کینہ۔ جمعہ نادے آ کیرج فیکٹری ٹی تینا دورہ نا وخت آ گپ و تران کرسا بنجائی وزیر پارے کہ نم تون وعدہ کیوہ کہ مچ آ ملک اٹی ریلوے نا جال اس تالان کینہ، ریلوے ءِ کٹیا کروک ادارہ اس جوڑ کننگ کن گام گیج کننگ اُن، مسافر ریل تا کمک اٹ 2 ارب روپئی زیات کٹیاکرینن۔ اوپارے کہ وی آئی پی ریل مارچ اٹی چلیفنہ۔ شیخ رشید احمد پارے کہ ریلوے نا مزور آتے گچین آسراتی تننگ کنا زمواری ءِ و زوت مزور آتا چناتا کوٹہ اس تخیوہ ۔ اوپارے کہ ای دمدستی وڑاٹ وزیراعظم عمران خان نا کنڈآن کیرج فیکٹری نا ملازم آتے مسہ ہزار روپئی فی کس تننگ نا پڑو ءِ کیوہ، ریلوے پولیس نا تنخواہ تے ودفسا پنجاب پولیس نا بریبر کینہ ۔ اوپارے کہ نیزگار مسافر آتے آسراتی تننگ کن گام گیج کننگ اُن۔ اوپارے کہ تھل ایکسپریس آ او تینٹ 12فروری آ بسال، جنڈ، کوٹ ادو، لیہ و ملتان آ کاہک۔ شیخ رشید احمد پارے کہ ریلوے نا بروک آ بجٹ ءِ ادارہ تینٹ جوڑ کیک و وزیراعظم آن منظوری ہلینہ۔ اوپارے کہ 20 پوسکن ءُ مسافر ریل و 2مال گاڈی چلیفینن پین اکن گام گیج کننگ اُن، ریلوے ملازم آتا پے اسکیل ءِ ودفنگ خواوہ۔ اوپارے کہ وزیراعظم عمران خان تون پارینون کہ شہباز شریف پی اے سی نا چیئرمین امنا کپنہ ۔ جمہوریت نا پن آ شہباز شریف ءِ پی اے سی ناچیئرمین جوڑ کننگا، ای عمران خان نا سیوتی اُٹ ، و ویل آتے ودی کننگ خواپرہ۔ وزیراعظم عمران خان کنے پی اے سی اکن پندار کرینے۔ اوپارے کہ پی اے سی نا چیئرمین مننگ نا سوب شہباز شریف آن سہی وڑ جاست وپاست کپننگ انگ ءِ، اسپیکر ءِ بایدے مرے کہ او ریمانڈ اٹی اونا پروڈکشن آرڈر ءِ جاری کپ۔ اسہ سوج اسے نا ورندی ٹی شیخ رشید احمد پارے کہ تدوک آ دے وزیراعظم عمران خان تون کنا اوڑدہی آن پد یخین مسنے کہ اوڑتون نئے ڈیل ءِ، نئے ڈھیل ءِ۔
