کوئٹہ۔ 08 فروری (اے پی پی) صوبائی وزیر خور و شرحالی سردار عبدالرحمان کھیتران پارینے کہ ساڑی صوبائی حکومت الس ءِ زند انا غٹ بنداوی آسراتی تے تننگ کن پبی گام گیج کننگ ءِ ، ضلع بارکھان اٹی السی شرحالی نا پوسکن ءُ ڈٹ بنا کننگ انگ ءِ ، اجتماعی وڑنا ڈٹ آتے اولیت تننگک، زوت ہر یونین کونسل نا دورہ ءِ کرسا السی ویل آتیان معلومداری دوئی کننگک، داخیال آتا درشانی ءِ او ضلع بارکھان نا چندی علاقہ غاتیان بروک آ خلقت تون گپ و تران کرسا کرے۔ صوبائی وزیر پارے کہ ہر یونین نا خلقت اسہ ایلو تون سلاہ کرسا اجتماعی شونداری ڈٹ انا وڑو مناسب جاگہ اس تجویز کیر اوفتا سلاہ غا عمل کننگک، ولے ہر علاقہ نا خلقت اجتماعی ڈٹ آتے گچین کیر تانکہ زیات آن زیات خلقت فائدہ ہرفنگ کے۔ صوبائی وزیر سردار عبدالرحمان کھیتران پارے کہ او بھاز زوت ضلع بارکھان نا ہر یونین کونسل نا دورہ ءِ کیک تانکہ خلقت تون ملسا اوفتا ویل آتے معلوم کننگ مرے و ویل آتے دمدستی ایسر کننگ نا ہروڑ کوشست کننگک، اوپارے کہ انفرادی اسکیم تے بے کچ گرج انا رداٹ تننگک ، اولیکو فہرست اٹی اجتماعی وڑانا اسکیم تے بناکننگک، صوبائی وزیر پارے کہ ضلع بارکھان اٹی روڈ آتا جوڑ کننگ، جان جوڑی نا ہند جاٹ، پوسکن آ اسکول آتا جوڑ کننگ، ویٹرنری ہسپتال، پوسکن آ ڈی تا جوڑ کننگ کون آ ڈٹ آتا سخت گرج ءِ ہراڑکن غٹ دوئی وسیلہ غاتے کاریم اٹ اتنگک ، اوپارے کہ ہر یونین کونسل اٹی کم و ود 65لکھ انا اسہ اجتماعی شونداری ڈٹ اس جتا کننگک اوپارے کہ او ٹاکڑی یونین آن تینا دورہ نا بناءِ کننگ ءِ و ہر یونین کونسل نا دورہ ءِ کیک و خلقت آن ویل آتامعلوم کرسا اوفتا درگہ غا ایسر کننگ نا ہروڑ کوشست کننگک۔
